विनोद चौधरीको नेटवर्थ २० करोड डलरले बढ्यो
काठमाडौं । नेपालका एकमात्र डलर अर्बपति विनोद चौधरीको नेटवर्थ १ वर्षको अवधिमा २० करोड डलरले बढेको छ । फोर्ब्सले सार्वजनिक गरेको अर्बपतिहरुको सूचीअनुसार सन् २०२५ मा चौधरीको नेटवर्थ २ अर्ब डलर कायम भएको छ । सन् २०२४ मा १ अर्ब ८० करोड डलर रहेको नेटवर्थ १ वर्षको अवधिमा २० करोड डलरले बढेको फोर्ब्सको तथ्यांकले देखाएको छ ।
फोर्ब्सको विश्वव्यापी अर्बपतिहरुको सूचीमा चौधरी १७६३औं स्थानमा रहेका छन् । उनी चौधरी ग्रुपका अध्यक्ष हुन् । उनको सबैभन्दा ठूलो सम्पति नबिल बैंक र लोकप्रिय वाई वाई चाउचाउको निर्माता सीजी फूड्समा रहेको फोर्ब्सले लेखेको छ । वाई वाईको भारत, सर्बिया र बंगलादेशमा पनि कारखानाहरु रहेका छन् ।
साथै, एउटा नयाँ कारखाना इजिप्टमा निर्माण भइरहेको छ । यसले विभिन्न प्रकारका ससहरु सार्वजनिक गर्ने योजना पनि बनाएको छ । सीजीले १४३ वटा होटलहरुको स्वामित्व र व्यवस्थापन गरिएको छ । जसमा भारतको ताज होटल चेनसँग सम्बन्धित विलासी होटलहरु पनि रहेको फोर्ब्सले जनाएको छ ।
