कोटेश्वरलाई ‘उपभोग्य बस्तु उपलब्धताको पहिचान’ सँग जोडेर पहिचान प्रवर्धन गरौँ : प्रमुख शाह
काठमाडौँ । कोटेश्वरलाई ‘उपभोग्य बस्तु उपलब्धताको पहिचान’ सँग जोडेर पहिचान प्रवर्धन गर्नु पर्नेमा काठमाडौँ महानगरपालिकाका प्रमुख बालेन्द्र शाह (बालेन) ले बताएका छन् । शुक्रबार (पुस १२) तीनकुनेमा काटेश्वर महोत्सवको शुभारम्भ गर्दै प्रमुख शाहले, नेपाली उत्पादनसँग व्यापारिक क्षेत्रको पहिचान प्रवर्धन गर्न आग्रह गरे ।
‘कोटेश्वरले आफ्ना उत्पादनलाई प्रवर्धन गर्नुपर्छ । पूजाआजाका सामान असनमा पाइन्छ । कपडा किन्न न्युरोड जाने गरिन्छ । मेकानिकल सामग्री त्रिपुरेश्वरमा पाइन्छ भने जस्तै गरेर व्यवसायीहरुले कोटेश्वरमा पाइने सामग्रीको प्रवर्धन गर्दै जानुपर्छ ।’ उनले भने, ‘नेपालमा बनेका सामान अलि महङ्गो हुन्छ । यसका उपभोक्ता कम भएर मूल्य धेरै भएको हो । अव उपभोक्ताले नेपाली उत्पादन खोज्दै पसलमा जानुपर्छ । व्यवसायीले पनि नेपाली उत्पादनलाई प्रवर्धन गर्नुपर्छ ।’
उनले तीनकुने जग्गाको मुआव्जाका विषयमा कुरा गर्दै अहिलेको राजनीतिक अवस्था समस्या समाधान गर्न सक्ने खालको भएको बताए ।
महोत्सवले व्यवसायलाई बजारसँग जोडेको छ । त्यस क्रममा महानगरपालिकाका उपप्रमुख सुनिता डंगोलले भनिन, ‘व्यवसायमा स्थानीय उत्पादनसँगै स्वदेशी उत्पादनलाई जोड्नुपर्छ ।’ कार्यक्रममा वडा नं. ३२ का अध्यक्ष नवराज पराजुलीले, कोटेश्वरमा उत्पादन भएका बस्तु तथा सामग्रीहरु छिमेकी वडामा जानकारी दिन महोत्सवले महत्वपूर्ण भूमिका खेल्ने बताइन ।
कोटेश्वर सतीदेवीको वायाँ हात पतन भएर पीठ स्थापना भएको ठाउँ हो । स्थानका विषयमा जानकारी दिँदै वडा सदस्य हीरादेवी पोखरलले, कोटेश्वरमा शिव मन्दिर, सतीदेवीको मन्दिर, गगनेश्वरको मूर्ति रहेको उल्लेख गरीन ।
महोत्सवले स्थानीय व्यापार प्रवर्धनबाट आर्थिक क्षेत्रमा देखिएका शिथिलतालाई सुधार गर्ने, व्यवसायी र उपभोक्ताका विचमा समधुर सम्बन्ध स्थापना हुने कोटेश्वर व्यवसायी संघका अध्यक्ष एवं महोत्सव मुल आयोजक समितिका अध्यक्ष गोरखबहादुर थापाको अपेक्षा छ ।
यस अवसरमा बजार क्षेत्रलाई साजसज्जा गरेर आकर्षक बनाइएको छ ।
