अवरुद्ध राहदानी सेवा अब पूर्णरुपमा सञ्चालनमा
काठमाडौं । कम्प्युटर प्रणालीमा समस्या देखिएर अवरुद्ध भएको राहदानी विभागबाट प्रदान गरिँदै आइएको सेवा सोमबार साँझदेखि पूर्णरुपमा सञ्चालनमा आएको छ । विभागले एक सूचना जारी गर्दै सोमबार साँझदेखि सेवा सञ्चालन भएको जनाएको हो ।
सेवा सञ्चालन भएसँगै सेवा लिन चाहनेले अनलाइन फाराम भरी विभागमा आवेदन दिनसक्ने व्यवस्था मिलाइएको विभागद्वारा जारी सूचनामा उल्लेख गरिएको छ । राहदानी विभागबाट राहदानी सेवा पूर्ण रुपमा प्रारम्भ गरिएको, अत्यावश्यक परी विभागबाट सेवा लिन चाहने सेवाग्राहीले अनलाइन फाराम भरी विभागमा आवेदन दिनसक्ने व्यवस्था मिलाइएको सूचनामा जनाइएको छ ।
यसैगरी जिल्ला-इलाका प्रशासन कार्यालयहरु तथा विदेशस्थित नेपाली नियोगहरुमा क्रमशः सेवाविस्तार गरिने यसअघिको सूचनाअनुरुप काम भइरहेकाले आजदेखि परीक्षणको काम सुरु गरिने सूचनामा उल्लेख छ ।
यसअघि आवेदन गरिसकेका (बायोमेट्रिक समेत) सेवाग्राहीको राहदानी छपाइ नियमित प्रक्रियाबाट भइरहेको र सम्बन्धित जिल्ला-इलाका प्रशासन कार्यालय तथा विदेशस्थित नेपाली नियोगहरुमा पठाउन सुरु गरिएको सूचनामा उल्लेख छ ।
“सेवाग्राहीलाई पर्न जाने असुविधाप्रति विभाग संवेदनशील रहेको र यथाशीघ्र समस्या समाधानका लागि आवश्यक सम्पूर्ण कार्यहरु गरिरहेको छ”, विभागद्वारा जारी सूचनामा उल्लेख गरिएको छ ।
रासस
