जन्ममिति र पदावधिलाई लिएर कपोलकल्पिक समाचार आयो: प्राधिकरण अध्यक्ष सिलवाल

काठमाडौं । नेपाल बीमा प्राधिकरणको अध्यक्ष सूर्यप्रसाद सिलवालको जन्ममिति र पदावधिलाई लिएर अहिले विवाद सतहमा आएको छ । विभिन्न मिडियामा यो विषय बाहिरिएपछि झनै शंकास्पद र पेचिलो बन्दै गएको देखिन्छ । अध्यक्ष सिलवालले विज्ञप्ति नै निकालेर स्पष्ट पारेका छन् । 

प्राधिकरणका अध्यक्ष सिलवाल वि.सं. २०७७ साल माघ १९ गते बसेको मन्त्रिपरिषद्को बैठकबाट नियूक्त भएका थिए । नेपाल बीमा प्राधिकरण (तत्कालीन बीमा समिति) को अध्यक्षमा उनी चार वर्षका लागि नियुक्त भई जिम्मेवारी निर्वाह गर्दै आइरहेका छन् । तर, अहिले आएर उनको जन्ममिति  विवादमा आउँदा अध्यक्ष पद नै ‘खतरा’मा देखिएको छ  । यद्यपि अध्यक्ष सिलवालले यसबारे विज्ञप्ति नै निकालेर स्पष्टिकरण दिएका छन् । उनले जन्ममितिको विषयमा कुनै विवाद गर्नु पर्ने भ्रम छर्नुपर्ने कारण नरहेको बताएका छन् ।

‘बीमा ऐन, २०४९ र बीमा ऐन, २०७९ दुबैमा अध्यक्षको पदावधि नियुक्त भएको मितिले चार वर्षको हुनेछ भन्ने स्पष्ट व्यवस्था रहेको हुँदा सोही व्यवस्था बमोजिम चार वर्ष पुग्ने मितिसम्म मेरो पदावधि कायम रहने कुरा स्पष्ट नै छ’ उनले विज्ञप्तिमा भनेका छन् ।  यस्तैगरी, बीमा ऐनमा अध्यक्ष पदको कुनै उमेर हद नतोकिएको यथार्थलाई बेवास्ता गरेर तथा त्यसमा मेरो उमेरको विषयलाई भ्रमणपूर्ण र निहित स्वार्थ प्रेरित ढङ्गले जोडेर समाचार प्रकाशित गरेको आरोप अध्यक्ष सिलवालले लगाएका छन् । 

यसर्थ, ऐनमा भएको व्यवस्था विपरित कुत्सित मनसायले केही संचार माध्यममा आएका भ्रमपूर्ण समाचारप्रति मेरो गम्भीर ध्यानाकर्षण भएको छ, उनले भने ।

 उनले आफ्नो जन्ममिति र प्राधिकरणको अध्यक्षको पदावधिलाई लिएर कपोलकल्पिक, भ्रमपूर्ण, मनगढन्ते र प्रचलित कानूनको आफूखुशी अपब्याख्या गरी कसैको स्वार्थ पूर्ति गर्न खोजेको आरोप लगाएका छन् । ‘मेरो मान, सम्मान, निष्ठा र प्रचलित बीमा ऐन नियम बमोजिम मैले निर्वाह गर्दै आएको भूमिकामा भ्रम सिर्जना गर्ने गलत मनसायले गरिएको दुषित प्रयासप्रति खेद व्यक्त गर्दछु’, विज्ञप्तिमा उल्लेख छ । 

विज्ञप्तिमा भनेका छन्, ‘मेरो शैक्षिक योग्यताको प्रमाणपत्रमा जन्म मिति वि.सं. २०१५ साउन १५ गते रहेको छ । वि.सं. २०३२ सालमा नागरिकता प्रमाणपत्र लिँदा मेरो उमेर १६ वर्ष कायम रहेको उल्लेख छ । त्यतिबेला नागरिकता प्रमाणपत्रमा जन्ममिति उल्लेख गर्ने खण्ड नभई उमेर मात्र खुलाउनु पर्ने भएकाले उमेर मात्र खुलाइएको हो ।’

‘यस अर्थमा मेरो जन्ममिति वि.सं. २०१६ साल भएको स्पष्ट छ । मैले त्यतिबेला लिएको नागरिकता प्रमाणपत्र धेरै पुृरानो÷झुत्रो भएका कारण काठमाडौं जिल्ला प्रशासन कार्यालयबाट प्रतिलिपि लिँदा नागरिकता प्रमाणपत्रमा जन्ममिति उल्लेख गर्नुपर्ने खण्डमा मेरो जन्मपात्रो (चिनो) मा भएको जन्ममिति वि.सं. २०१६/७/२२ खुुलाइएको छ ।’

‘मैले नागरिकता प्रमाणपत्रको प्रतिलिपि मात्र लिएको हुँ, अर्को नागरिकता प्रमाणपत्र लिएको छैन । मसँग एउटा मात्र नागरिकता छ । यस वास्तविकतालाई बेवास्ता गरी प्रतिलिपिलाई पनि कुत्सित मनसायले नयाँ नागरिकता प्रमाणपत्र भन्दै तीनवटा नागरिकता प्रमाणपत्र लिएको भनी कपोलकल्पित, मनगढन्ते र दुषित किसिमले भ्रमपूर्ण समाचार तयार गरी प्रकाशन गरिनु दुःखद् छ, खेदजनक छ, आपत्तिजनक छ’ विज्ञप्तिमा भनिएको छ । 

निजामती सेवा ऐन र नियमावलीमा जन्ममिति गणना गर्दा नागरिकता वा शैक्षिक प्रमाणपत्रमा उल्लेखित मिति फरक फरक भईं कायम गर्नुपर्दा जुन उमेर अघि आउँछ सोही अनुसारको उमेर कायम हुने व्यवस्था भए बमोजिम मेरो शैक्षिक प्रमाणपत्रको ज्रन्ममिति नागरिकता प्रमाणपत्रको जन्ममितिभन्दा अगाडि भएकाले वि.सं. २०१५/४/१५ लाई जन्ममिति मानी नेपाल सरकारको सचिवबाट मेरो अनिवार्य अवकाश भएको व्यहोरा मेरो व्यक्तिगत विवरण फाइलमा स्पष्ट नै छ ।

यसर्थ, सम्बद्ध सरकारी निकायमा भएका कागजातबाट नै स्पष्ट हुने विषयलाई तोडमरोड गरिनु, यसका बारेमा मनगढन्ते कथा तयार गरेर समाचारको रुप दिनु घोर आपत्तिजनक छ, खेदजनक छ ।’