अर्गानिक कृषिको सम्भावना तथा अवसरका विषयमा सीएनआई युवा उद्यमी मन्चको छलफल
काठमाडौं । नेपाल उद्योग परिसंघ युवा उद्यमी मञ्चले नेपालमा अर्गानिक कृषिको सम्भावना तथा अवसरका बिषयमा छलफल गरेको छ।
शुक्रबार मञ्चले जनता एग्रो एण्ड फरेष्ट्रीसँगको सहकार्यमा नेपालका लागि इजरायली राजदूत हानन गोडर गोल्डबर्गरसँग नेपालमा अर्गानिक कृषिको सम्भावना तथा अर्गानिक कृषिका फाइदाहरुका विषयमा छलफल गरेको हो ।
त्यस अवसरमा राजदूत गोल्डबर्गरले इजरायलले सीमित वर्षाका बावजुद आफ्नै देशमा पर्याप्त खाद्यान्न उत्पादन गर्न सफल मात्र नभएर निर्यातसमेत गरिरहेको बताए । इजरायलले प्रयोग गरेका आधुनिक कृषि प्रणालीहरुका बिषयमा जानकारी गराउँदै उनले नेपाली उद्यमीहरूलाई भारतका कृषि केन्द्रहरूको भ्रमण गरी उन्नत कृषिका बारेमा ज्ञान प्राप्त गर्न आग्रह गरे।
कार्यक्रममा गोल्यान ग्रुपका अध्यक्ष पवन गोल्यानले जनता एग्रो एण्ड फरेष्ट्री लिमिटेडमा कृषि उद्यमीका लागि लगानी, साझेदारी तथा उत्पादन खरिदका बारेमा आफ्नो धारणा राखेका थिए ।
नेपाल उद्योग परिसंघ युवा उद्यमी मञ्चका अध्यक्ष अनुराग गोयलले नेपालको कृषि क्षेत्रमा नवप्रवर्तन र विकासलाई प्रवर्द्धन गर्न मञ्चले आफ्नो तर्फबाट सक्दो सहयोगी भूमिका खेल्ने बताए। उनले स्टर्टअपहरुलाई नेपालमा अर्गानिक कृषिको पूर्ण सम्भावनालाई उपयोग गर्न निरन्तर सहयोग गर्ने समेत बताए ।
