यति एयरलाइन्समा यात्रा गर्ने धनमाया राईले जितिन् बजाजको पल्सर मोटरसाइकल
काठमाडौं । यति एयरलाइन्सले सञ्चालन गरेको ‘महोत्सवको बहार, यतिको उडानमा शान्दार उपहार’ चाडपर्व–विशेष अफरको बम्पर उपहार धनमाया राईले जितेकी छन् ।
यतिले फेसबुक लाइभमार्फत् गरेको ‘लक्की ड्र’मा राईले बजाज कम्पनीको तर्फबाट ३ लाख ३९ हजार ९ सय रूपैयाँ मूल्य बराबरको पल्सर एनएस २०० सीसीको मोटरसाइकल प्राप्त गरेकी हुन् । राईले यति एयरलाइन्समा ढ कात्तिकमा काठमाडौं–विराटनगर उडान गरेकी थिइन् ।
यस्तै दोस्रो पुरस्कार बिन्दा श्रेष्ठले हात पारेकी छिन् । उनले थाइलायन एअरको तर्फबाट दुई जनाको लागि बैंकक (थाइल्याण्ड)को दुईतर्फी हवाई टिकट प्राप्त गरेकी छिन् । श्रेष्ठले यति एअरलाइन्समार्फत २१ कात्तिकमा विराटनगर–काठमाडौं उडान गरेकी थिइन् ।
यसैगरी तेस्रो पुरस्कार कार्तिक २७ गते काठमाडौं–भैरहवा उडान गरेकी तीर्थकुमारी भण्डारीले प्राप्त गरेकी छन् । तेस्रो पुरस्कारको रुपमा भण्डारीले एकलाख ५ हजार मूल्य बराबरको एलजीको वासिङ मसिन जितेकी हुन् ।
त्यस्तै, चौथो पुरस्कार आयुष पौडेलले हात परेका छन् । उनले बालाजी डाइमण्डको तर्फबाट ८२ हजार रूपैयाँ मूल्य बराबरको हिराको टप प्राप्त गरेका हुन् । उनले ७ कात्तिकमा पोखरा–काठमाडौं उडान गरेका थिए ।
सोही योजना अन्तर्गत, यति मोबाइल एप वा बेवसाइटमार्फत् टिकट काटी उड्ने यात्रुहरुमध्ये विमल कर्मचार्य र अभिशेख अमनले सिद्धार्थ बुटिक होटलको जोडीसहित ‘नाइट स्टे’ प्राप्त गरेका छन् ।
त्यस्तै, अर्जुन सिंह र निलमकुमारी महतोले फार्म सपको तर्फबाट र सरोज डंगोल र शारदा अधिकारीले लुक्ला आउट डोरको तर्फबाट ७ हजार रूपैयाँ बराबरको गिफ्ट ह्याम्पर प्राप्त गरेका छन् ।
त्यस्तै, हरेक यात्रुले पठाओ, मिसिसा र इना सेन्टरको तर्फबाट स्योरहट प्राइजको रुपमा डिस्काउण्ट भौचर प्राप्त गरेका थिए भने विशेष क्रियशनको तर्फबाट ३ जना यात्रुहरुले १ हजार ५ सय रुपैयाँ मूल्य बराबरको गिफ्ट भौचर प्राप्त गरेका थिए ।
यति एयरलाइन्सले चाडपर्वको समयमा यात्रा गर्ने आफ्ना यात्रुहरुलाई लक्षित गरी २८ असोज (घटस्थापना)देखि ७ मंसिर (छठ पर्व)सम्म ४० दिनको अवधिभर उडान भर्ने यात्रुबीच ‘लक्की ड्र’ गरेको थियो ।
सोही अवधिमा करिब एकलाख यात्रुहरुले यति एयरलाइन्समा यात्रा गरेको प्रवक्ता सुदर्शन बर्तौलाले जानकारी दिए । बिजेता यात्रुहरुलाई एअरलाइन्सले सम्पर्क गरी उपहार वितरण गरिने उनले जानकारी दिए ।
