सिटिजन्स बैंकको एकल ऋण लगानीमा १० मेगावाटको सिद्धि खोला जलविद्युत आयोजना निर्माण गर्न कर्जा सम्झौता सम्पन्न
![Siddhi_khola_hydropower_citizen_bank_international Siddhi_khola_hydropower_citizen_bank_international](https://www.arthikpati.com/wp-content/uploads/2024/01/Siddhi_khola_hydropower_citizen_bank_international-1024x585.webp)
काठमाडौं । सिटिजन्स बैंक इन्टरनेसनलको एकल ऋण लगानीमा १० मेगावाटको जलविद्युत परियोजना निर्माण हुने भएको छ । प्रदेश नं. १ को ईलाम जिल्ला साविक समलबुङ र जिर्मले गाविस (हालको सुर्योदय नगरपालिका र रोड गाँउपालिका) मा निर्माण हुने सिद्धि हाइड्रोपावर कम्पनी लि प्रवर्द्धक रहेको १० मेगावाट क्षमताको सिद्धि खोला जलविद्युत आयोजनामा प्रवर्द्धक कम्पनी र बैंकबीच विहिबारका दिन वित्तीय व्यवस्थापनका लागि सम्झौतामा हस्ताक्षर भएको हो । उक्त सम्झौतामा बैंकका प्रमुख कन्सर्सोटियम इन्फ्रास्ट्रक्चर बैंकिंग युनिटका रोशन मल्ल र कम्पनीका प्रबन्ध संचालक सन्तोश राज नेपालले हस्ताक्षर गरेका हुन् ।
परियोजनाको अनुमानित लागत करीब १ अर्ब ७३ करोड रुपैयाँ (निर्माण अवधीको व्याज बाहेक) मा बैंकले ७५/२५ को ऋण स्वपूँजी अनुपातमा १ अर्ब २९ करोड रुपैयाँ बराबरको ऋण लगानी गर्नेछ ।
निर्माण अवधीको व्याज सहित बांकी लागत प्रवर्द्धकहरुवाट स्वपूँजी जुटाइने छ। सो आयोजनाले आगामी साढे २ वर्ष भित्र निर्माण सम्पन्न गरी बिद्युत उत्पादन गर्ने लक्ष्य राखेको छ । कम्पनीका अनुसार आयोजनाबाट हिउँदमा ८.८०५ गिगावाट घन्टा र वर्षामा ४६.९११ गिगावाट घन्टा गरी बार्षिक ५५.७१६ गिगावाट घन्टा विद्युत उत्पादन गरिनेछ ।
सिटिजन्स बैंक इन्टरनेसनल लिमिटेडले देशैभरी फैलिएका आफ्ना १ सय ९० वटा शाखा, १ सय ५१ वटा एटिएम र ९७ वटा शाखा रहित बैंकिङ ईकाईहरुबाट १६ लाख ९६ हजार ग्राहकवर्गलाई आधुनिक बैंकिङ सेवाहरु प्रदान गर्दै आएको छ ।