बुटवल पावर कम्पनीको खुद नाफा १२.५१ प्रतिशतले घट्यो

काठमाडौँ । बुटवल पावर कम्पनीको खुद नाफा घटेको छ । कम्पनीले चालु आर्थिक वर्षको पहिलो त्रैमासमा ७ करोड ५१ लाख ३८ हजार रुपैयाँ खुद नाफा कमाएको छ । उक्त नाफा गत वर्षको यसै अवधिमा कमाएको ८ करोड ५८ लाख ८६ हजार रुपैयाँको तुलनामा १२.५१% ले घटेको हो । विद्युत बिक्रीको आम्दानी र वित्तीय आम्दानीमा पनि गिरावट आएपछि खुद नाफा घटेको देखिन्छ । 

 

विद्युत बिक्रीको आम्दानी १.८३% ले घटेर २१ करोड ५ लाख ३० हजार रुपैयाँमा सीमित भएको छ । गत वर्ष भने विद्युत बिक्रीबाट २१ करोड ४४ लाख ५५ हजार रुपैयाँ आम्दानी गरेको थियो । यता, विद्युत उत्पादन तथा वितरण लागत केही घटाएपछि सञ्चालन नाफा ०.२५% ले बढेको छ । यद्दपि,  वित्तीय आम्दानी पनि ५०.१२% घटेपछि समग्रमा खुद नाफा प्रभावित भएको हो । 

 

हाल बुटवल पावरको सेयर पुँजी ३ अर्ब ४० करोड ९० लाख ६५ हजार रुपैयाँ र अन्य इक्विटी ३ अर्ब ६४ करोड २७ लाख २४ हजार रुपैयाँ रहेको छ । असोज मसान्तसम्मकोे प्रतिसेयर आम्दानी २.२० रुपैयाँ पैसा छ । गत वर्ष प्रतिसेयर आम्दानी २.६५ रुपैयाँ रहेको थियो । यसको प्रतिसेयर नेटवर्थ २०६.८५ रुपैयाँ छ । यता, सम्पतिमा प्रतिफल (आरओए) १.१२% बाट घटेर असोज मसान्तसम्म ०.९८% मा आएको छ ।