सांस्कृतिक पोसाकको जगेर्ना गर्दै कामना सेवा विकास बैंक
काठमाडौँ । सांस्कृतिक पोसाकको जगेर्ना गर्ने उद्देश्यले कामना सेवा विकास बैंकले आफ्ना कर्मचारीहरूलाई आफ्नो समुदाय झल्कने पोसाक लगाउन भनेको छ । कामना सेवा विकास बैंकका प्रमुख कार्यकारी अधिकृत दिनेश थकालीका अनुसार हरेक महिनाको पहिलो सोमबार बैंकले आफ्ना कर्मचारीहरूलाई आफ्नो कामका साथै आफ्नो समुदायको भेषभूषा, सांस्कृतिक पहिचान झल्कने पोसाक लगाउन भन्ने गरेको छ ।
उक्त अभियानलाई बैंकका सम्पूर्ण कर्मचारीहरूले साथ दिएर सांस्कृतिक भेषभूषाको महत्त्व झल्काउँदै आएको बैंकको भनाई छ । साउनको पहिलो सोमबार पनि बैंकका सबै कर्मचारीहरूले आफ्ना समुदायको सांस्कृतिक भेषभूषा लगाएर काम गरेका छन् ।
