नागरिक लगानी कोषको चुक्ता पूँजी वृद्धि गर्न सरकारकाे स्वीकृति
काठमाडौं । सरकारले नागरिक लगानी कोषको चुक्ता पूँजी वृद्धि गर्ने निणर्य गरेको छ । बुधबार साँझ बसेको मन्त्रिपरिषद्को बैठकले कोषको पूँजी ५ अर्ब ३१ करोड ३७ लाख ५० हजार रुपैयाँ कायम गर्न स्वीकृति प्रदान गरेको हो ।
यस्तै सरकारले धुर्मुस सुन्तली फाउण्डेसनले “गिरानचौर एकीकृत नमूना बस्ती पुननिर्माण तथा पर्यटन प्रवर्द्धन परियोजना“ को स्वामित्वमा रहेको घरजग्गा हस्तान्तरण गर्दा असुल गर्नुपर्ने अग्रिम कर छुट दिने निणर्य पनि गरेको छ ।
मन्त्रिपरिषद् बैठकका निणर्यहरु यस्ता छन् ।
१. धुर्मुस सुन्तली फाउण्डेसनले “गिरानचौर एकीकृत नमूना बस्ती पुननिर्माण तथा पर्यटन प्रवर्द्धन परियोजना” को स्वामित्वमा रहेको घरजग्गा हस्तान्तरण गर्दा असुल गर्नुपर्ने अग्रिम कर छुट दिने ।
२. नागरिक लगानी कोषको चुक्ता पुँजी वृद्धि गरी रू. ५ अर्ब ३१ करोड ३७ लाख ५० हजार कायम गर्न स्वीकृति प्रदान गर्ने ।
३. विद्युतीय (इलेक्ट्रोनिक) कारोबार ऐन, २०६३ को दफा ६० को उपदफा (५) बमोजिम सोही ऐनको परिच्छेद – ९ मा उल्लेख भए बमोजिमका कसूरको शुरु कारबाही र किनारा गर्ने अधिकार तथा बैङ्किङ कसूर तथा सजाय ऐन, २०६४ को दफा १७ को उपदफा (१) बमोजिम सोही ऐनको दफा ३ को खण्ड (ग) बमोजिमको कसूरको शुरु कारबाही र किनारा गर्ने अधिकार सबै जिल्ला अदालतलाई तोक्ने ।
४.नेपाल-चीन सीमानाको तातोपानी/झाङमु स्थित सीमा चिन्ह (स्तम्भ) ५३(१) लाई यथास्थानमा संयुक्त रुपमा पुनः स्थापनाका लागि नेपाली टोली गठन गर्ने ।
५.महिला विरुद्ध हुने सबै प्रकारका भेदभाव उन्मूलन गर्ने महासन्धि (CEDAW), १९७९ को सातौं आवधिक प्रतिवेदन CEDAW समितिमा पठाउन स्वीकृति दिने ।
६. माननीय उपप्रधानमन्त्री तथा रक्षामन्त्री पूर्णबहादुर खड्कालाई ओमानमा हुने 8th NRNA Middle East Regional Conference (MRC) मा प्रमुख अतिथिको रुपमा सहभागिता जनाउन स्वीकृति दिने ।
७. नेपाल सरकार र बेलायत सरकारबीचको द्विपक्षीय श्रम सम्झौता कार्यान्वयन सम्बन्धी कार्ययोजना ( Implementation Protocol) स्वीकृत गर्ने ।
८. चीनको सिचुवान प्रान्त, छेन्दुङमा २०८० साल असार १२ गतेदेखि १४ गते सम्म Sichuan Council को आयोजनामा हुन 12th China (Sichuan)-South Asia and Southeast Asia Business Leaders’ Summit कार्यक्रममा सहभागी हुन म्याग्दी जिल्लाका जिल्ला समन्वय समिति प्रमुख राजकुमार थापाको भ्रमण स्वीकृत गर्ने।
