२६ औँ पूर्वी भूमध्यसागरीय अन्तर्राष्ट्रिय पर्यटन तथा यात्रा प्रदर्शनी एएमआईटीटी सम्पन्न

काठमाडौं । टर्कीको इस्तानबुलमा २६ औँ पूर्वी भूमध्यसागरीय अन्तर्राष्ट्रिय पर्यटन तथा यात्रा प्रदर्शनी एएमआईटीटी EMITT-2023 सम्पन्न भएको छ । चैत्र २९ देखि वैशाख २ गतेसम्म (१२–१५ अप्रिल २०२३) सम्म चलेको कार्यक्रममा नेपाल पर्यटन बोर्ड र नेपाली पर्यटन कम्पनीहरूले सहभागिता जनाएका थिए ।

Hyve Fuarcilik A.S. को आयोजना, आइसीए समूहको सहयोग र समर्थनमा, टर्कीको संस्कृति र पर्यटन मन्त्रालय, टर्किस एयरलाइन्स र इस्तानबुल महानगरपालिकाको संयोजनमा आयोजित EMITT-2023 ले टर्की र विश्वव्यापी यात्रा क्षेत्रहरूलाई नयाँ व्यापार र सहयोगको अवसर प्रदान गर्ने व्यापार मञ्च खोलेको सहभागीहरुले प्रतिक्रिया दिएका छन् ।

कार्यक्रममा २३० भन्दा बढी होस्ट गरिएका पर्यटन खरिदकर्ताहरू, ३३ देशका प्याभिलियनहरू, छुट्टी गन्तव्यहरू, गर्मी र शीतकालीन पर्यटन, बाहिरी पर्यटक गन्तव्यहरू, होटलहरू र पर्यटन केन्द्रहरू, टुर अपरेटरहरू, ट्राभल एजेन्सीहरू र अन्य धेरै कुराहरू प्रदर्शन गरिएको थियो ।

EMITT-2023 मा सुन्दर ढंगले सजाइएको नेपालको स्ट्यान्ड टर्कीका टुर अपरेटरहरू, मिडिया, प्रभावशाली र उपभोक्ताहरूले भ्रमण गरेका थिए । सहभागीहरुले नेपाली पर्यटन कम्पनीहरूले आफ्ना ट्राभल प्याकेजहरू सम्भावित टर्की यात्रुहरूका बीचमा बजारीकरण गर्ने र टर्कीका टुर अपरेटरहरूसँग वार्ता र व्यापार सम्झौता गर्ने अवसर पाएको कार्यक्रममा सहभागी नेपाल पर्यटन बोर्डका प्रबन्धक गोविन्द ओवीले जानकारी दिनुभयो । टर्कीमा ठूलो अर्थतन्त्र भएको र टर्किस एयरलाइन्सद्वारा इस्तानबुलदेखि काठमाडौंसम्मको सिधा उडान सञ्जाल भएकोले टर्कीमा नेपाली पर्यटन उद्योगको लागि ठूलो आउटबाउन्ड पर्यटन सम्भावना रहेको र मेला फदायी भएको उहाँले बताउनु भयो ।