अब २१ दिनभित्रै ब्रोकर शाखा अनुमति दिने तयारीमा छौंः अध्यक्ष हमाल
काठमाडौं । नेपाल धितोपत्र बोर्डका अध्यक्ष रमेश हमालले नयाँ स्टक एक्सचेञ्जको आवश्यकतामा जोड दिएका छन् । शुक्रबार एकट ब्रोकर एशोसियशन अफ नेपालको २८ औं वार्षिक साधारणसभालाई सम्बोधन गर्दै उनले पुँजीबजार विकासका लागि प्रतिस्पर्धा आवश्यक रहेको भन्दै नयाँ एक्सचेञ्जको अनिवार्यता औंल्याएका हुन् ।
उनले भने, ‘राम्रो प्रतिस्पर्धा हुने हो भने बजार अटो मोडमा जान्छ । बजारमा पारदर्शीता र प्रतिस्पर्धी वातावरण बनाउने हो भने रियल सेक्टर पनि पुँजीबजारमा आउँछन् ।’
शाखा विस्तारका लागि समिति बनाएर काम गरिसकएको र २१ दिन भित्रमा नै अनुमोदित हुनेगरी तयारी भइरहेको उनले जानकारी दिए । लगानीकर्ताको समस्याबारे आफूले राष्ट्र बैंकलाई जानकारी दिने र हालका सबै समस्या समाधान आफू लाग्नुपर्ने आश्वासन समेत सो अवसरमा लगानीकर्ताहरुलाई दिएका थिए ।
नेपाल स्टक एक्सचेञ्जका प्रमुख कार्यकारी अधिकृत कृष्ण बहादुर कार्कीले बजारको दिगोपनाको लागि साक्षरता कार्यक्रम आवश्यक रहेकोमा जोड दिए । आफू ब्रोकरहरुसँग मिलेर पुँजीबजार सम्बन्धी साक्षरतामा सहभागी बन्ने आश्वासन समेत उनले दिएका छन् ।
कार्यक्रममा नेपाल इन्भेष्टर फोरमका अध्यक्ष तुल्सीराम ढकालले लगानीकर्ताहरुले पुँजीबजारबारे शिक्षा पाएका छन् की छैनन् भन्ने विषयमा ब्रोकरहरुले ध्यान दिनुपर्ने बताए । देशका सबै प्रदेशमा लगानीकर्ता सचेतना कार्यक्रमको आवश्यकता रहेकोमा उनले जोड दिएका थिए ।
