नागरिकता विवाद ४ वर्ष अगाडि सल्टिएको हो : रवि लामिछाने |
![20221116093406_download 20221116093406_download](https://www.arthikpati.com/wp-content/uploads/2023/02/20221116093406_download-1024x585.jpg)
काठमाडौं । राष्ट्रिय स्वतन्त्र पार्टीका सभापति तथा चितवन क्षेत्र नम्बर २ का उम्मेदवार रवि लामिछानेले आफ्नो अमेरिकी पासपोर्ट र नेपाली नागरिकतासम्बन्धी विवाद ४ वर्षअगाडि नै सल्टिएको विषय भएको स्पष्ट गरेका छन् ।
लामिछानेको नागरिकताको विषयमा प्रश्न उठाउँदै निर्वाचन आयोगमा उजुरी परेपछि लामिछानेले फेसबुक लाइभमार्फत प्रष्ट पारेका हुन् । ‘निर्वाचन आयोगलाई जवाफ त पठाइहाल्छु । मैले जवाफ त दिनुनै पर्छ । तर, जुन विषय उठाइएको छ आज भन्दा ४ भन्दा अगाडि सल्टिएको विषय हो’, लामिछानेले भने, ‘सबै जानकारी गराइसकेको विषय हो । उजुरी पर्नु ठूलो कुरा होइन, उजुरी परिसकेपछि जवाफ दिनुपर्छ ।’
प्रक्रिया पुरा गरेर आफ्नो नेपाली नागरिकता कायम गरिएको स्पष्ट गर्दै लामिछालेले उजुरीको विषयमा आत्तिनु पर्ने विषय केही नभएको बताए । आफू अमेरिकाका सबै सुविधा छाडेर देश फर्किएको भन्दै लामिछालेले औपचारिक रुपमा पैसा तिरेर र निवेदन दिएर अमेरिकी पासपोर्ट परित्याग गरेको बताए । ‘निर्वाचनको मुखमा कसैका लागि यो फन्डा भयो होला । हामीमाथि फिजिकल र डिजिटल दुबै आक्रमण निरन्तर चलिनै रहेको छ’, उनले भने, ‘ यसबाट विचलित भएको छैन र कोही पनि नहुनुहोला । आयोगको पत्र आएको छैन । आएपछि आयोगलाई उचित जवाफ दिने नै छु । त्यसैका आधारमा यहाँहरुलाई जानकारी हुने नै छ।