साधना लघुवित्तको नाफा उल्लेख्य बढ्यो |
काठमाडौं । साधना लघुवित्त वित्तीय संस्था लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार गत आर्थिक वर्षको सोही अवधिको तुलनामा लघुवित्तको नाफा उल्लेख्य बढेको छ।
चालु आर्थिक वर्षको पहिलो ६ महिनासम्ममा लघुवित्तले ७ करोड ५७ लाख रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा ११५.९१ प्रतिशत बढी हो। गत आर्थिक वर्षको सोही अवधिसम्ममा लघुवित्तले ३ करोड ५० लाख रुपैयाँ खुद नाफा कमाएको थियो।
खुद ब्याज आम्दानी बढेसँगै निष्क्रिय कर्जा घटेपछि लघुवित्तको खुद नाफा उल्लेख्य बढ्न पुगेको हो।
समीक्षा अवधिमा लघुवित्तको खुद ब्याज आम्दानी ६१.४६ प्रतिशत बढेको छ भने सञ्चालन मुनाफा १०९.४४ प्रतिशत बढेको छ। समीक्षा अवधिमा लघुवित्तको निष्क्रिय कर्जा ३.५२ प्रतिशतबाट घटेर १.२८ प्रतिशतमा झरेको छ। जसले गर्दा सम्भावित जोखिम बापतको व्यवस्थामा लघुवित्तको १ करोड ४० लाख रुपैयाँ मात्र छुट्याएको छ। गत आर्थिक वर्षको सोही अवधिसम्ममा लघुवित्तले यस्तो व्यवस्थाबापत २६ करोड ११ लाख रुपैयाँ छुट्याएको थियो। पुस मसान्तसम्ममा लघुवित्तले १ करोड ६१ लाख रुपैयाँ खराब कर्जा उठाउन सफल भएको छ।
नाफासँगै लघुवित्तको प्रतिशेयर आम्दानी पनि बढेको छ। समीक्षा अवधिमा लघुवित्तको यस्तो आम्दानी १४ रुपैयाँ ९५ पैसा बढेर ४७ रुपैयाँ १८ पैसा पुगेको छ।
समीक्षा अवधिमा लघुवित्तको चुक्ता पूँजी ४७.५० प्रतिशत बढेको छ भने जगेडा कोष ४७.३२ प्रतिशत बढेको छ। त्यसैगरी, लघुवित्तको सापटी ५४.६१ प्रतिशत र निक्षेप ८७.७३ प्रतिशत बढेको छ भने कर्जा ८७.३४ प्रतिशत बढेको छ।
सो अवधिसम्ममा लघुवित्तको मूल्य आम्दानी अनुपात २९.५३ गुणा रहेको छ भने प्रतिशेयर नेटवर्थ १४२ रुपैयाँ ६२ पैसा रहेको छ।
