श्री उग्रतारा बहुउद्देयीय सहकारी र ॐ शान्ति बचत तथा ऋण सहकारीकाे एकिकृत कारोबार सुरु |

काठमाडौं । श्री उग्रतारा बहुउद्देयीय सहकारी संस्था र ॐ शान्ति बचत तथा ऋण सहकारी संस्था एक आपसमा गाभिएर ॐ श्री शान्ति बहुउद्देयीय सहकारीका नामबाट एकिकृत कारोबार सुरु भएको छ । 

शनिबार श्री उग्रतारा बहुउद्देयीय सहकारीको २२ औं साधारण सभा र ॐ शान्ति बचत तथा ऋण सहकारीकाे १३ औं बार्षिक साधारण सभालाई एकिकृत साधारण सभाको रुपमा परिणत गरी बहुमत सदस्यको अनुमति पछि एकिकृत कारोबार सुरु गरिएको घोषणा गरीएकाे हाे ।

संयुक्त साधारण सभाले एकिकृत कारोबारको लागि अत्याधुनिक सफ्टवेयर प्रयोग गरी सदस्यहरुले जुनसुकै सेवा केन्द्रबाट सेवा लिन सक्ने र भविष्यमा सेवा केन्द्रहरुको विस्तार गरी कार्यक्षेत्रको समेत विस्तार गर्ने, ट्याब्लेट बैंकिङ्गको सुरुवात गर्ने र आधुनिक सूचना प्रविधिको प्रयोग गरी सदस्यहरुलाई मोवाईल बैंकिङ्ग सेवा समेत प्रदान गर्ने योजना तय गरेको संस्थाका अध्यक्ष गोविन्द शर्माले बताए ।

यसैगरी संस्थाले सदस्यहरुको लागि “जन्म देखि मृत्यु सम्म ॐ श्रीशान्ति सहकारी हरेक सदस्यको घरघरसम्म कार्यक्रम” अन्तर्गत सदस्य वीमा कार्यक्रमको सुरुवात गर्ने र संस्थाका सदस्यहरुलाई सुत्केरी भेटघाट कार्यक्रम अन्र्तगत महिला उपसमितिको समन्वयमा सदस्यहरु सुत्केरी हुँदा संस्थाबाट कपडा र १,५०० रूपैयाँ भत्ता सहित भेटघाट गरी बधाई ज्ञापन कार्यक्रम लागू गरिएको शर्माले बताए ।

एकिकरण पश्चात संस्थाको विनियम पुर्नलेखन गर्ने, आन्तरीक नीतिहरु परीमार्जन गर्ने र सम्पत्ति शुद्धिकरण तथा आतंकवादी क्रियाकलापमा वित्तीय लगानी निवारण सम्बन्धी सहकारी संघ संस्थालाई जारी गरिएको निर्देशन २०७४ बमोजिम संस्थाका सदस्यहरुको व्यक्तिगत विवरणहरु अध्यावधिक गर्ने कार्य गरीरहेको शर्माले बताए । अध्यक्ष शर्माले संस्थाको भावी कार्यक्रम र योजना अन्तर्गत समान प्रकृतिका संस्थाहरुसंग एकिकरण गर्ने, संस्थाको शेयर पूँजीको बृद्धि गरी ४ करोड पुर्याउने र निक्षेप बृद्धि गरी १४ करोड पुर्याउने र सदस्यहरुको वृद्धि गरी ४,५०० पुर्याउने लक्ष्य पेश गरे।

साधारण सभाको उद्धघाटन गर्दै कम्पनी रजिष्टार कार्यालयका प्रमुख प्रदिपराज अधिकारीले पूँजी निर्माण र उत्पादनशील क्षेत्रमा लगानी बढाउन अनुरोध गर्दै सम्बृद्धि र शान्ति सँगसँगै अगाडि बढाउनुपर्नेमा जोड दिए।