आँधिखोलाको नाफा उल्लेख्य बढ्यो |
काठमाडौं । आँधिखोला लघुवित्त वित्तीय संस्था लिमिटेडले गत आर्थिक वर्षको चौथो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार लघुवित्तको खुद नाफा उल्लेख्य बढेको छ।
गत असार मसान्तसम्ममा लघुवित्तले ४ करोड १० लाख रुपैयाँ खुद नाफा आर्जन गरेको छ। यो अघिल्लो आर्थिक वर्षको सोही अवधिको तुलनामा ११४.९५ प्रतिशत बढी हो।
लघुवित्तको खुद ब्याज आम्दानी र सञ्चालन मुनाफा बढेसँगै सम्भावित जोखिम बापतको व्यवस्थामा रकम नछुट्याएका कारण खुद नाफा उल्लेख्य बढेको हो।
समीक्षा अवधिमा लघुवित्तको खुद ब्याज आम्दानी ३८.६९ प्रतिशत बढेको छ भने सञ्चालन मुनाफा १०२.८५ प्रतिशत बढेको छ। सो अवधिसम्ममा लघुवित्तले २० लाख रुपैयाँ खराब कर्जा उठाएको छ।
समीक्षा अवधिमा लघुवित्तको चुक्ता पूँजीमा कुनै परिर्वतन भएको छैन भने जगेडा कोष १०६.५९ प्रतिशत बढेको छ। त्यसैगरी, लघुवित्तको सापटी ५१.४७ प्रतिशत, निक्षेप २९.१४ प्रतिशत र कर्जा ४८.८८ प्रतिशत बढेको छ।
खुद नाफा बढेसँगै लघुवित्तको प्रतिशेयर आम्दानी (ईपीएस) २२ रुपैयाँ ५ पैसा बढेर ४१ रुपैयाँ ६ पैसा पुगेको छ। सो अवधिसम्ममा लघुवित्तको मूल्य आम्दानी अनुपात ११.३२ गुणा रहेको छ भने प्रतिशेयर नेटवर्थ १८० रुपैयाँ १८ पैसा पुगेको छ।
