दुबई एयरपोर्टमा १०० यात्रु अलपत्र, जहाज रित्तै फर्कियो |
युएई । आज बिहान ३ː५५ बजे दुवईबाट काठमाडौं लागि हुने भनिएको नेपाल एयरलाइन्सको उडान नम्बर (आरए–२२९२) रद्द भएपछि एयरपोर्ट पुगेका दर्जनौं नेपाली यात्रुहरु अलपत्र परेका छन् । उनीहरु ५ घण्टा अघिनै एयरपोर्ट पुगेका थिए ।
अन्तिम समयमा उडान रद्द हुँदा दुबईको अन्तर्राष्ट्रिय बिमानस्थलमा दर्जनौँ नेपाली यात्रुहरु अलपत्र परेका हुन् । होटल क्वारेन्टिन सुनिश्चित गरिएपछि मात्रै उडान स्वीकृति दिने तथा यसअघि जारी भएका उडान अनुमति समेत स्थगित गरिदिन सीसीएमसीले संस्कृति पर्यटन तथा नागरिक उड्डयन मन्त्रालयलाई पत्र लेखे लगतै तय भएका उद्धार उडानहरु स्थगित गरिएको हो ।
उद्धार गरिएकालाई राख्न होटल व्यवस्थापन नभएको भन्दै सीसीएमसीले नै मन्त्रालयलाई उद्धार उडान स्थगित गर्न भनेको हो ।
नेपालमा बढ्दो कोरोना संक्रमणको अवस्थाले गर्दा बिभिन्न स्थानीय तहहरुले निषेधित क्षेत्र घोषणा गर्ने बड्दो क्रम र होटल क्वारेण्टिनका लागि होटल व्यबस्था भएको जानकारी प्राप्त नभएको अवस्थामा होटल, क्वारेण्टिन सुनिश्चितता हुने गरी मात्र उडान स्वीकृति दिन भन्दै कोभिड–१९ संकट व्यवस्थापन संचालक केन्द्र (सीसीएमसी) ले संस्कृति पर्यटन तथा नागरिक उड्डयन मन्त्रालयलाई पत्र लेखेको थियो ।
तर, अन्तिम अवस्थामा भएको सरकारी निर्णयले स्वदेश फर्कन लागेका नेपाली नागरिकहरुले सास्ती व्यहोर्नु परेको छ।दुबई एयरपोर्टबाट एक सय ७० किलो मिटर टाढा युएईको राजधानी आबुधावीबाट एयरपोर्ट आएका यात्रुहरुलाई सम्बन्धित एयरलाइन्स टिकट बिक्रेता र एजेन्सीले अन्तिम अवस्थामा उडान तालिका रद्द भएको जानकारी नगराएकोले उनीहरु बिचल्ली परेका हुन् ।
स्वदेश फर्कने खुशियालीमा अधिकांश यात्रुहरुले आफ्नै खर्चले (पिसीआर) टेष्ट समेत गराएका थिए । युएईमा पिसीआर टेष्ट गर्न २ सय चालिस दिर्हाम अर्थात करिब (८ हजार रुपियाँ) लाग्छ ।
हवाई टिकटको चर्को शुल्कमा पिल्सिएका उनीहरुलाई उडान नहुँदा फेरी पिसीआर टेष्ट गर्नु पर्ने बाध्यता आएको छ । पिसीआर टेष्ट गरेको ७२ घण्टा भित्र सम्बन्धित यात्रुले उडान अनुमति पाउछन् । उडान कहिले हुने भन्ने अझै सुनिश्चिता नभएको हुँदा अबुधाबीबाट आएका दर्जनौं नेपाली यात्रुहरुलाई वासस्थानको पनि समस्या हुने देखिएको छ ।
गत आइतवार युएईस्थित नेपाली दूतावासले नेपाल एयरलाइन्स सहित बिभिन्न एयरलाइन्सको १५ वटा उडान तालिका सार्वजनिक गर्दै आफुलाई पायक पर्ने मिति र एयरलाइन्सको टिकट लिन भन्दै सुचना प्रकाशित गरेको थियो । उडान स्थगित भएपछि पनि नेपाली दूतावास युएईले उडान स्थगन भएको सूचना निकालेको छैन ।
युएईबाट घर बिदामा गएका नेपाली कामदार लिएर जहाज १ː०० बजे दुबई आइपुगेको थियो । तर नेपाल फर्कदा भने रित्तै फर्किएको छ ।
