समता लघुवित्तको नाफा २५७ प्रतिशतले वृद्धि |
काठमाडौं । चालू आवको पुस मसान्त सम्ममा समता लघुवित्त वित्तीय संस्थाको नाफा २५७ प्रतिशतले वृद्धि भएको छ । कम्पनीले सो अवधिमा रू. २ करोड ५८ लाख नाफा कमाएको हो । यो नाफा गत आवको सोही अवधिमा रू. ७२ लाख १७ हजार नाफा कमाएको थियो ।
चालू आवको पुस मसान्त सम्ममा रू. २ करोड ५९ लाख खराब कर्जा उठाउन कम्पनी ब्यवस्थापक सफल भएकाले नाफामा वृद्धि भएको हो । पुस मसान्त सम्ममा कम्पनीले रू. ५ करोड ४८ लाख खुद ब्याज आम्दानी गरेको छ भने सञ्चालन नाफा रू. १ करोड ४६ लाख रहेको छ ।
कम्पनीको चुक्ता पूँजी रू. १९ करोड ११ लाख छ । यस वर्ष कम्पनीले शेयरधनीलाई १० प्रतिशत बोनस शेयर वितरण गरेको हो । रिर्जभ कोषमा रू. ९ करोड १५ लाख छुट्याएको छ ।
खराब कर्जा संकलनमा वृद्धि भएकाले निष्क्रिय कर्जा १ दशमलव ७९ प्रतिशत बाट १ दशमलव ६८ प्रतिशतमा झरेको छ । प्रतिशेयर आम्दानी –वार्षिक) २७ दशमलव ०३, मूल्य आम्दानी अनुपात २५ दशमलव ०५ र प्रतिशेयर नेटवर्थ रू. १४७ दशमलव ८८ छ । दोस्रो बजारमा कम्पनीको शेयर मूल्य बिहिवार प्रतिकित्ता रू. ७३९ मा कारोबार भएको हो ।
