कोरोना भाइरसले लियो १७ चिनियाँको ज्यान | वुहानको सार्वजनिक यातायात बन्द, घुम्न नजान र नआउन अपिल
काठमाडौं । चीनको वुहान सहरबाट फैलिएको कोरोना भाइरसले १७ चिनियाँको मृत्यु भएको छ । स्वास्थ्य अधिकारीहरूले बुधबारसम्म संसारभर ५८२ जनामा यो भाइरसको संक्रमण देखिएको जनाएका छन् । त्यसमध्ये ५७१ जना चिनियाँ छन् ।
कोरोना भाइरसको प्रकोप फैलँदै गएपछि चीनको घना आवादी रहेको एक सहरको सार्वजनिक यातायात तथा उडान सेवा बन्द गराइएको छ ।
भाइरसको फैलावट अन्य क्षेत्रमा फैलन नदिन चीन चीन सरकारले बढाएको सतर्कताअन्तर्गत वुहान सहरको सार्वजनिक यातायात बन्द गराइएको हो ।
वुहान कोरोना भाइरसबाट सबैभन्दा बढी प्रभावित चीनको सहर हो । यहाँ झण्डै १ करोड १० लाख मानिसको बसोबास छ । बीबीसीका अनुसार, संक्रमित क्षेत्रबाट अन्य स्थानमा कोरोना भाइरस पुग्ने खतरा बढेपछि सहरमा बस्ने सबै नागरिकलाई एक साता कहीँ कतै पनि ननिस्कन त्यहाँको सरकारले उर्दी जारी गरेको छ । त्यस्तै, अन्य स्थानबाट वुहानमा नआउन पनि भनिएको छ ।
चिनियाँ नयाँ वर्ष नजिकिँदै छ । चिनियाँहरूले घुमघाम गरेर आफ्नो नयाँ वर्ष मनाउने प्रचलन छ । यसरी प्रभावित क्षेत्रमा मानिस घुमघाममा निस्किँदा संक्रमण थप फैलने खतरा भएपछि सरकारले सार्वजनिक यातायात बन्द गर्दै घरबाट ननिस्कन नागरिकलाई अपिल गरेको छ ।
स्वास प्रश्वासमा संक्रमण गराउने कोरोना भाइरस वुहानका अतिरिक्त चीनका अन्य सहरसम्म यतिबेला फैलिरहेको बताइएको छ । यति मात्रै होइन, अमेरिकामा समेत यो भाइरसको संक्रमण देखिएपछि यसले विश्वव्यापी रूप लिनसक्ने चिन्ता व्यक्त भइरहेका छन् ।
यद्यपि, विश्व स्वास्थ्य संगठनले अहिले नै यसले विश्वव्यापी रूप लिने खतरा नरहेको बताएको छ ।
