नेशनल मेडिकल कलेज र विद्यार्थीहरुबीच चारबुँदे सहमति, आन्दोलन फिर्ता |
काठमाडौं । नेशनल मेडिकल कलेज वीरगञ्ज र आन्दोलनरत विद्यार्थीहरुबीच चारबुँदे सहमति भएको छ । यससँगै आजबाटै पठनपाठन शुरु हुनेछ । १० मंसिरमा शिक्षा मन्त्रालयमा भएको सहमति कार्यान्वयनका क्रममा कलेज प्रशासन र आन्दोलनरत विद्यार्थीहरुबीच वार्ता भएको थियो ।
वार्तामा कलेज प्रशासनले शैक्षिक वर्ष २०७५∕७६ का पहिलो किस्ता र केही अतिरिक्त शुल्क तिरिसकेका विद्यार्थीहरुको विधि परीक्षा, रजिष्ट्रेसन, काउन्सिल रजिस्ट्रेसन , होस्टल र खानाको कटौती गरेर बाँकी रकम आउँदो किस्तामा समायोजन गर्ने सहमति जनाएको छ । समायोजनको लिस्ट एक सातामा प्रकाशित गर्नुपर्नेछ ।
शैक्षिक वर्ष २०७५∕७६को हकमा तोकिएको शुल्क बाहेक अरु आजैबाट समायोजन र फिर्ता प्रक्रिया शुरु गर्ने सहमति भएको छ । आगामी दिनमा त्रिभुवन विश्वविद्यालयले तोकेको शुल्क मात्र दिने, आन्दोलन गरेका आधारमा विद्यार्थीलाई पूर्वाग्रह नराख्ने र आन्दोलन फिर्ता लिने पनि सहमति भएको छ ।