बंगलादेशलाई हराउँदै नेपाल साग फुटबलको फाइनलमा प्रवेश |
काठमाडौं । १३औं दक्षिण एसियाली खेलकुद (साग) अन्तरगत पुरुष फुटलबमा नेपाल फाइनलमा पुगेको छ । आइतबार दशरथ रंगशालामा भएको खेलमा बंगलादेशमाथि १–० गोलको जित निकाल्दै नेपालले फाइनलको यात्रा पक्का गरेको हो ।
अब नेपालले स्वर्णको लागि मंगलबार भुटनसँग खेल्नेछ । ९ अंकसहित दोस्रो स्थानमा रहेको भुटान फाइनल पुगिसकेको छ । जितपछि शीर्ष स्थानमा उक्लिएको नेपालको १० अंक भएको छ ।
पहिलो हाफको ११औं मिनेटमा कप्तान सुजल श्रेष्ठको पासमा गोल गर्दै सुनिल बलले नेपाललाई अग्रता दिलाएका थिए । नेपालले समूह चरणमा भुटानलाई ४–० गोलले हराएको थियो । दोस्रो खेलमा नेपालले श्रीलंकासँग १–१ गोलको बराबारी खेलेको थियो ।
तेस्रो खेलमा शनिबार नेपालले माल्दिभ्सलाई २–१ गोलले हरायो । भारतमा भएको सागको अघिल्लो संस्करणमा पनि पुरुष फुटबलमा नेपालले स्वर्ण जितेको थियो । आयोजक भारतमाथि २–१ गोलको जित निकाल्दै नेपाल स्वर्ण लिएर घर फर्किएको थियो ।
यसपालिको सागको पुरुष फुटबलमा भारत भने सहभागी छैन ।
