सुनका गरगहना चोरी गर्ने प्रहरीको नियन्त्रणमा |
काठमाडौं । प्रहरीले काठमाडौंको बूढानीलकण्ठ क्षेत्रबाट सुनका गरगहना चोरी गरेको आरोपमा एक जनालाई पक्राउ गरेको छ । महानगरीय प्रहरी प्रभाग बूढानीलकण्ठले बारा घर भई हाल काठमाडौं बस्दै आएका रूपेश यादव लाई पक्राउ गरेको हो ।
प्रहरीले उनलाई हिजो सोमवार बेलुकी साढे ४ बजे बूढानीलकण्ठ नगरपालिका– ६ बाट पक्राउ गरेको हो । यादवले बूढानीलकण्ठ स्थित रेखा तिवारीको घरबाट सुनका विभिन्न गरगहना चोरी गरेको अनुसन्धानका क्रममा खुल्न आएको प्रहरीले बताएको छ ।
प्रहरीले तिवारीको घरमा रङरोगनको काम गर्ने यादवले चोरी गरी लुकाई राखेको अवस्थामा सुनको १ तोलाको औठी, सुनको सिक्री र नगद ५ हजार फेला पारेको छ । उक्त घटनाका सम्बन्धमा प्रहरीले थप अनुसन्धान गरिरहेको छ ।
