युरोपेली लगानी बैंकका उपाध्यक्ष एन्ड्रु म्याकड्वेल राजधानीमा |
काठमाडौं । युरोपेली लगानी बैंकका उपाध्यक्ष एन्ड्रु म्याकड्वेल नेतृत्वको उच्चस्तरीय प्रतिनिधिमण्डल हिजो राजधानी आइपुगेको छ । उक्त प्रतिनिधिमण्डल नेपालको चार दिवसीय भ्रमणमा राजधानी आइपुगेको हो । नेपालको ऊर्जा, यातायात तथा वन क्षेत्रमा सहयोगका क्षेत्र पहिल्याउन सम्बन्धित निकायका व्यक्ति तथा संस्थासँग परामर्शका साथै चिलिमे–त्रिशूली प्रसारण लाइनको शिलान्यासमा सहभागी हुन पनि उक्त टोली नेपाल आएको हो ।
बैंकको उच्चतहको टोली पाँच वर्षको अन्तरालमा पहिलो पटक नेपाल भ्रमणमा आएको हो । उक्त भ्रमणले नेपालको भौतिक पूर्वाधार निर्माणमा देखिएको आर्थिक अभावलाई केही हदसम्म भए पनि सम्बोधन गर्ने अपेक्षा गरिएको छ ।
प्रधानमन्त्री केपी शर्मा ओलीसँग टोलीले भेटवार्ता गर्ने कार्यक्रम रहेको यहाँस्थित युरोपेली प्रतिनिधिमण्डलले जानकारी दिएको छ ।
बैंकको टोलीले नेपालको मन्त्रिपरिषद्का सदस्य, कूटनीतिज्ञ एवम् उद्योगी व्यवसायीसँग पनि भेटवार्ता गर्ने कार्यक्रम रहेको छ ।
