विराटनगर बथनाह रेल्वे खण्डमा अक्टोवरभित्रै रेलको इन्जिन आउँदै |
काठमाडौं । ६ वर्षअघि निर्माण सुरु भएको विराटनगर बथनाह रेल्वे खण्डमा रेल संचालन हुने सम्भावना बढेर गएको छ । सो खण्डमा परीक्षणका लागि रेलको इन्जिन ल्याइने भएको छ । भारत बथनाहदेखि विराटनगर महाननगरपालिका १८ बुधनगरसम्म निर्माण गरिएको ट्रयाकमा परीक्षणका रुपमा रेलको इन्जिन कुदाइन लागेको हो ।
रेलमार्ग निर्माणको ठेक्का लिएको भारतीय इरकोण इन्टरनेशनल लिमिटेडले अक्टोवर महिनाभित्र नै परीक्षणकालागि ट्रायल गर्ने तयारी भएको जानकारी दिएको छ । कम्पनीका अनुसार भारत र नेपाल तर्फ ७.६ किलोमिटर रेल्वे ट्रयाक बिच्छयाउने काम पुरा भएको छ ।
भारत तर्फ ५ र नेपालतर्फ करिब ३ किलोमिटर क्षेत्रमा रेल्वेको ट्रयाक बिच्छयाइएको छ । नेपालतर्फ अझै १० किलोमिटर क्षेत्रको काम वाँकी छ । रेल्वे ट्रयाक विराटनगर रंगेली सडकखण्ड अन्तरगत कटहरीसम्म खनिएको छ । ट्रयाक करिव १६ किलोमिटर खनिएपनि ७.६ किलोमिटर क्षेत्रमा मात्र रेलको लिक बिच्छ्याइएको छ ।
निर्माणधिन रेल परियोजनाको रेल विभाग नेपालका महानिर्देशक बलराम मिश्रसहितको टोलीले अनुगमन पनि गरेको छ । शुक्रवार अनुगमनका लागि आएको टोलीले नेपाल तर्फ निर्माणधीन रेल्वे लाइनका बारेमा जानकारी लिएको थियो ।
बथनाहादेखि कटहरीसम्म १८ दशमलव १ किलोमिटर रेलमार्ग निर्माणका लागि ५ सय ६५ जग्गा धनीबाट १ सय १९ विघा जग्गा अधिकरण गरिएको थियो । तर ती मध्ये केही जग्गा धनीले मुआब्जा लिएका छैनन् । अधिग्रहण गरिएको जग्गाको प्रति कठ्ठा न्यूनतम ९० हजारदेखि २५ लाखसम्म मूल्यांकन गरेर ५३ करोड रुपैयाँ मुआब्जा बितरण गरिएको थियो ।
भारत सरकारले ३ अर्व ७३ करोड भारतीय रुपैयाँको लागतमा बथनाहादेखि कटहरीसम्म रेलमार्ग निर्माण गरिरहेको छ । हालसम्म २ अर्व ३५ करोड रुपैया बरावरको काम सम्पन्न भएको बताइएको छ ।
