टिच फर नेपाललाई कुमारी बैंकको रू. १२ लाख सहयोग |
काठमाडौं । कुमारी बैंक लिमिटेडले टिच फर नेपालको सामुदायिक विद्यालयको शैक्षिक गुणस्तर सुधार गर्न र सार्वजनिक शिक्षा सबल बनाउने अभियानलाई सहयोग गरेको छ । बैंकले उक्त अभियानलाई निरन्तरता दिने उद्देश्यले १२ लाख रुपैयाँ सहयोग गरेको हो । बैंकका प्रमुख कार्यकारी अधिकृत सुरेन्द्र भण्डारीले टिच फर नेपालका अध्यक्ष रेशु अर्याल ढुंगानालाई सो रकमबराबरको चेक आइतवार हस्तान्तरण गरेका हुन् ।
यस अभियानबाट राष्ट्रिय तथा अन्तरराष्ट्रिय विश्व विद्यालयहरूबाट स्नातक तह उत्तीर्ण नेपाली युवाहरूले २ वर्ष स्वयंसेवी शिक्षकको रूपमा अंग्रेजी, गणित र विज्ञान विषयहरूमा देशका विभिन्न ग्रामीण क्षेत्रका सार्वजनिक विद्यालयहरूमा प्रशिक्षण दिने गरेका छन् ।
सन् २०१३ सालमा ललितपुरको ग्रामीण क्षेत्रमा ३३ जना शिक्षकहरूले शुरू गरेको यो अभियानलाई २०१४ मा सिन्धुपाल्चोक र २०१५ मा धनुषा जिल्लामा समेत बिस्तार गरिएको थियो । यस अभियानमा हालसम्म २ सय ७० जनाभन्दा बढी शिक्षकहरूले सामुदायिक विद्यालयहरूमा प्रशिक्षण दिइसकेका छन् ।
