चर्चित बलिउड अभिनेता गोविन्दा शनिवार काठमाडौं आउँदै |
काठमाडौं । बलिउडका चर्चित अभिनेता गोविन्दा काठमाडौं आउने भएका छन् । आगामी आइतवार हुने एलजी सिने अवार्ड कार्यक्रममा भाग लिन उनी काठमाडौं आउने भएका हुन् ।
गोविन्दाले सो कार्यक्रममा वरिष्ठ फिल्मकर्मी किशोर रानालाई लाइफ टाइम एचिभमेण्ट अवार्ड दिने कार्यक्रम रहेको छ । कार्यक्रममा भाग लिन आगामी शनिबार गोविन्दा आफ्नो परिवारसहित काठमाडौं ओर्लनेछन् ।
एलजी सिने सर्कल अवार्डको विधागत उत्कृष्ट फिल्मको नाम पनि आइतवार सार्वजनिक गरिसकिएको छ । जसमा उत्कृष्ट फिल्मतर्फ सात फिल्महरू ‘छक्का पञ्जा २’, ‘पञ्चायत’, ‘शत्रुगते’, ‘लिलिबिली’, ‘भुइँमान्छे’, ‘मंगलम्’ र ‘तिमीसँग’ प्रतिस्पर्धामा रहेका छन् । उत्कृष्ट निर्देशकतर्फ पनि यिनै फिल्मबाट क्रमशः दीपाश्री निरौला, शिवम् अधिकारी, प्रदीप भट्टराई, मिलन चाम्स, नवराज बुढाथोकी, नवल नेपाल र शिशिर राणा परेका छन् ।
यता अवार्डका लागि अभिनेतातर्फ दयाहाङ राई, अनमोल केसी, प्रदीप खडका, पुष्प खडका, सरोज खनाल, राज कटुवाल र नाजिर हुसेनबीच प्रतिस्पर्धा हँुदै छ भने अभिनेत्रीतर्फ साम्राज्ञी राज्यलक्ष्मी शाह, नीता ढुंगाना, बेनिशा हमाल, शिल्पा पोखरेल र प्रियंका कार्की प्रतिस्पर्धामा छन् । अवार्डमा उत्कृष्ट अनस्क्रिन जोडी, चर्चित अभिनेता, अभिनेत्रीदेखि उत्कृष्ट स्टण्ट, भीएफएक्स, ट्रेलर, पोष्टरजस्ता विधासहित २२ विधामा अवार्ड दिइन लागेको आयोजकले जानकारी दिएका छन् ।
