सरकारको पाँचमहिने उपलब्धि सार्वजनिक | सिण्डिकेट अन्त्यदेखि सार्वजनिक खर्चमा मितव्ययितासम्म
काठमाडौं । प्रधानमन्त्री केपी शर्मा ओली नेतृत्वको सरकारले आफूले कार्यभार सम्हालेपछि गरेका कामहरू सार्वजनिक गरेको छ । सरकारले सोमबार आफ्नो पाँचमहिने उपलब्धि विस्तृत रूपमा सार्वजनिक गरेको हो ।
सरकारले आफ्नो अहिलेसम्मको कार्यकालको उपलब्धि सार्वजनिक गर्दै सुन तस्करमाथिको कारबाही, सिण्डिकेटको अन्त्य, सार्वजनिक खर्चमा मितव्ययिता, विकास निर्माणमा भइरहेको ढिलासुस्तीको अन्त्य तथा रकम मात्र खर्च हुने औचित्यहीन भ्रमणमा नियन्त्रणलगायतका विषयलाई प्रमुख उपलब्धिको रूपमा लिएको छ । यसैगरी, नारायणगढ–मुग्लिन सडक स्तरोन्नति, तुइन विस्थापित, पेट्रोलियम पदार्थ भण्डारणका लागि नुवाकोटको बट्टार, तनहुँको आँबुखैरेनी, काभ्रेपलाञ्चोक र ललितपुरमा स्थान छनोटलाई पनि सरकारले आफ्नो मुख्य उपलब्धिमा राखेको छ ।
यसैगरी, सिमरा–बर्दिबासु रेलमार्गको ट्रयाकको ८० प्रतिशत काम सकिएको, मुग्लिनमा त्रिशूली नदीमा आर्कब्रिज अन्तिम चरणमा पुग्नु, तथा नागढुंगामा सुरुङ मार्ग निर्माण हुनुलाई पनि सरकारले आफ्नो उपलब्धिको सूचीमा राखेको छ ।
पेट्रोलियम चुहावट रोक्न ट्याङ्करमा लकिङ सिष्टम, राजदूत नियुक्तिमा नयाँ मापदण्ड, डुबान समस्याको दीर्घकालीन समाधान, जलमार्गको स्थलगत अध्ययन, लक्ष्यभन्दा बढी राजस्व संकलन, विकास खर्चमा वृद्धिलगायतका विषयलाई पनि उपलब्धिको रूपमा उल्लेख गरिएको छ । भेरी–बबई डाइभर्सनको ६ किलोमिटर सुरुङ निर्माण, काठमाडौं–तराई फास्ट ट्रयाकमा १९ हजार रुख काटिनु, सार्वजनिक खर्चमा मितव्ययिता, सामाजिक सुरक्षा भत्ता वितरणमा पारदर्शिताजस्ता विषय पनि सरकारले आफ्नो उपलब्धीको रूपमा प्रतिवेदनमा उल्लेख गरेको छ ।
