पहिरोले पर्वतका ८ घर विस्थापित |
पर्वत (आपास) । गत शनिवार राति परेको वर्षासँगै गएको पहिरोमा परी पर्वतको महाशिला गाउँपालिका–५, लुङ्खुदेउरालीमा रहेको एक बस्ती नै विस्थापित हुन पुगेको छ । पहिरोका कारण उक्त स्थानमा रू. १ करोडभन्दा बढीको क्षति पुगेको अनुमान गरिएको छ ।
सडक बनाउँदा खलबलिएको जमीनमा लगातार वर्षा भइरहँदा पहिरो गई बस्ती नै विस्थापित हुन पुगेको हो । उक्त स्थानमा अझै पनि पहिरो झरिरहेको हुनाले त्यहाँका ८ घर विस्थापित भएका हुन् । वडाध्यक्ष जीवन ठकुरीले सो पहिरोमा परी ३ घर पूर्ण रूपमा क्षतिग्रस्त भएको बताए । उनले बाँकी ५ घर तत्काल स्थानान्तरण गर्नुपर्ने अवस्थामा रहेको र बस्ती स्थानान्तरणको प्रयास भइरहेको जानकारी दिए । पहिरोको जोखीममा रहेका छवि अधिकारीसँगै विष्णु अधिकारी र मेघनाथ अधिकारीलाई तत्काल अस्थायी टहरा बनाउन जस्तापाता र नगद सहयोग गरिएको छ ।
