‘जीएआई फुड एन्ड वेभरेज एन्ड हस्पिटालिटी’ आजदेखि आयोजना हुँदै
काठमाडौं । आज (२८ देखि ३०) गतेसम्म ‘जीएआई फुड एन्ड वेभरेज एन्ड हस्पिटालिटी २०२४’ आयोजना हुने भएको छ ।
अयाेजकका अनुसार काठमाडौंको भृकुटीमण्डपमा सञ्चालन गरिने उक्त एक्स्पोमा ५ हजार ब्रान्ड, ३ सय कम्पनी र २ हजार ५ सय वर्ग मिटरभन्दा बढीका २ सय वटा स्टल रहने छन् ।
प्रदर्शनीमा आगन्तुकहरूले उत्पादन तथा सेवाहरूका साथै उत्पादक र आपूर्तिकर्ताहरूको विस्तृत अवलोकन/चयन गर्न सक्ने विज्ञप्तीमा बताइएको छ । गत वर्षको तुलनामा यस वर्ष प्रदर्शकको संख्या ४० प्रतिशतले बढेको बताइएको छ ।
जीएआई फूड एन्ड वेभरेज एन्ड हस्पिटालिटी २०२४ ले ३० हजार भन्दा बढी आगन्तुकहरूलाई आकर्षित गर्ने अपेक्षा गरेको छ भने आगन्तुकहरूमध्ये करिब १५ हजार व्यावसायिक आगन्तुकहरू हुने अपेक्षा गरिएको छ ।
जीएआई एफबीएचले होटल व्यवसायीहरू, रेस्टुरेन्ट, क्लब, बार, पब, पार्टी-प्यालेस र क्यान्टिन, किराना – पसलका मालिकहरू, बेकरी तथा स्न्याक्स उत्पादकहरू, कृषि खाद्य प्रशोधक तथा उत्पादकहरू र तिनका प्रबन्धकहरू, क्याटरर र सेफहरू, बार टेन्डरहरू तथा बारिस्टाहरूलाई आकर्षित गर्ने आशा लिएको छ । कार्यक्रम मुख्यतया बिजनेस टु बिजनेस मोडेलको भए पनि उपभोक्ताहरूले पनि ठूलो संख्यामा भ्रमण गर्ने अपेक्षा गरिएको छ ।
एक्सपोमा विगत वर्षझैँ यस वर्ष पनि मौलिक कार्यक्रमहरूलाई समावेश गरिएको छ । यस वर्ष साना कम्पनी, व्यावसायिक व्यापार, स्वतन्त्र उद्यमी र स्टार्ट-अपको पहुँचमा एक्स्पोलाई पुर्याउन ‘साना व्यवसाय मार्ट’ पनि सुरुवात गरिने भएको छ । यी कम्पनीहरूले विशिष्ट र नवीन उत्पादन तथा सेवाहरू समावेश गरेर बजारमा धेरै प्रभाव पार्न सक्ने आयोजकको भनाइ छ ।
