आन्तरिक राजस्व विभागको ‘व्यावसायिक कारोबारको रकम व्यक्तिगत खातामा जम्मा गर्न नपाईने’ निर्देशनको पालना गर्न इसेवाको अपिल

काठमाडौं । इसेवाले आफ्ना प्रयोगकर्ताहरुलाई पनि आफ्नो व्यापार तथा व्यवसायको भुक्तानी आफ्नो व्यक्तिगत इसेवा खातामा जम्मा नगर्न अनुरोध गरेकाे छ । नेपाल सरकारको निर्देशन अनुसार आफ्नो व्यापार-व्यवसायमा भुक्तानी लिनको लागि इसेवा मर्चेन्ट बन्न इसेवाले अपिल समेत गरेकाे छ।

नेपाल सरकारको आर्थिक विधेयक २०८१ बाट आयकर ऐन २०७८ को दफा ८१ क अन्तर्गत व्यावसायिक कारोबार बापतको रकम व्यक्तिगत खातामा जम्मा गर्न नपाइने नियमको कडा रुपमा पालना गर्न आन्तरिक राजस्व विभागको करदाता शाखाको निर्देशन रहेको छ । निर्देशन अनुसार कुनै पनि व्यक्तिले व्यावसायिक कारोबार बापत प्राप्त नगद, चेक, क्यू आर कोड तथा अन्य कुनै पनि विद्युतीय माध्यमबाट प्राप्त हुने कुनै पनि रकम व्यक्तिगत बैंक खातामा जम्मा गर्न पाइने छैन ।

जारी आर्थिक वर्ष २०८१/८२ को बजेटको पूर्णपाठमा उल्लेखित ‘व्यावसायिक कारोबारको भुक्तानी विद्युतीय माध्यम वा क्यूआर कोड मार्फत गर्दा व्यावसायिक खातामा भुक्तानी गर्नुपर्ने कानुनी व्यवस्था’ बमोजिम व्यावसायिक कारोबार व्यावसायिक क्यूआर मार्फत गर्न प्रोत्साहनका लागि यही अगस्ट १, २०२४ देखि इसेवाको सेण्ड मनी(Send Money)सेवा प्रयोग गर्दा शुल्क लाग्नेछ । कारोबार दिनमा ३ पटक गरि महिनामा ३० पटकसम्म नि:शुल्क रहनेछ, साथै १०० रूपैयाँ मुनिका सबै सेण्ड मनी कारोबार निःशुल्क रहनेछन् । यो बाहेकका सबै Send Money कारोबारमा प्रति कारोबार १० रूपैयाँ सेवा शुल्क लागू हुनेछ ।