कोशी प्रदेश गल्फ संघको अध्यक्षमा सुयस प्याकुरेल चयन
इटहरी । कोशी प्रदेश गल्फ संघको शुक्रबार भएको साधारणसभाले सुयस प्याकुरेलको अध्यक्षतामा ९ सदस्यीय कार्यसमितिको चयन गरेको छ ।
कोशी प्रदेश खेलकुद विकास बोर्डका सदस्य सचिव हंशराज वाग्लेको प्रमुख आतिथ्यतामा भएको साधारणसभामा करिव ३ दर्जन गल्फरहरुको उपस्थिती रहेको थियो ।
कार्यक्रममा बोल्दै सदस्य सचिव वाग्लेले आगामी दशैँ राष्टिय खेलकुद प्रतियोगिताको लागि योग्य टिम छनौट गर्न समेत अहिलेबाट तयारी थाल्नुपर्ने बताउँदै बोर्डको तर्फबाट गर्ने सहयोगमा आफु तत्पर रहेको बताए । उनले सानै भएपनि गल्फको प्रतियोगिता सञ्चालन गर्न गठन हुने कमिटीलाई आग्रह गरेका थिए ।
यस अघि गठन भएको तदर्थ समितिलाई भंग गर्दै पुर्ण समितिको अध्यक्षमा व्यावसायी सुयस प्याकुरेल सर्वसम्मत भएका छन् भने उपाध्यक्षमा भरत तामाङ्ग चयन भएका छन् ।
समितिको अन्य पदाधिकारीहरुमा बल बहादुर राई र सन्तोष कार्की चयन भएका छन् भने सदस्यहरुमा राजिव घिमिरे, राजेन रार्ई, सुमित्रा लिम्बु, प्रदिप कुमार सारडा चयन भएका छन् ।
सर्वसम्मत चयन भएका कार्यसमितिको नेतृत्व पाएका प्याकुरेलले निर्वाचित भएपछि कार्यसमितिको तर्फबाट बोल्दै खेलमैदानको विकास गर्न र प्रदेशमा गल्फको प्रवर्द्धन गर्न लागि पर्ने प्रतिवद्धता व्यक्त गरेका थिए ।
