सुन्दर ढोका सेवाको आयोजनामा पोखरामा राष्ट्रिय ह्वीलचियर बास्केटबल च्याम्पियनसिप–२०८० को आयोजना हुँदै
ललितपुर । अपांगताको क्षेत्रमा क्रियाशिल संस्था सुन्दर ढोका साथी सेवाको आयोजनामा पोखरामा विकास शिल्ड राष्ट्रिय ह्वीलचियर बास्केटबल च्याम्पियनसिप नेपाल २०८० प्रतियोगिता हुने भएको छ ।
संस्थाका कार्यकारी निर्देशक स्वर्गीय विकास अधिकारीको दोस्रो वार्षिक स्मृतिमा पोखरा रंगशालाको बास्केटबल कोर्टमा र रामघाटस्थित पुन समाजको कर्बड हल फागुन २०–२१
(मार्च ३–४) गते मंगलबार र बुधबार हुने उक्त प्रतियोगितामा १५ टोलीको सहभागिता रहने संस्थाका कार्यकारी निर्देशक विजात अधिकारीले जानकारी दिए ।
प्रतियोगितामा आर्मीको टिम र सशस्त्रको टिमसहित सातै प्रदेशबाट पुरुष ९ टिम, महिला टिम ६ समुहले प्रतिस्पर्धा गर्ने आयोजक संस्थाका संस्थापक अध्यक्ष कोष विलास अधिकारीले बताए ।
सुन्दर ढोका साथि सेवाका कार्यकारी निर्देशक स्वर्गीय विकास अधिकारीको स्मृतिमा स्थापित विकास शिल्ड अपाङ्गता भएका व्यक्तिहरूको लागि राष्ट्रियस्तरको खेलकुद आयोजना गर्ने एक परियोजना हो ।
स्वर्गीय अधिकारीले आफनो जीवन नै अपांगता भएका व्यक्तिहरुको मुहारमा उत्साह, खुशी, जोश, आनन्द, सम्मान र मर्यादाको साथ पूर्णताको जीवन अनुभव गर्न पैरवी गर्ने कार्यमा आफनो जीवन समर्पित गरेकाले उनको सम्मान स्वरुप प्रत्येक २ वर्षमा एक पटक विभिन्न राष्ट्रियस्तरको अपांगता खेलकुद कार्यक्रम आयोजना गर्ने उनको जीवन संगिनी साथै संस्थाका कार्यकारी निर्देशक विजात अधिकारीले जानकारी दिइन ।
सुन्दर ढोका साथी सेवाको मुख्य प्रायोजनमा हुने उक्त प्रतियोगिताको विजेता हुने महिला तथा पुरुष ६ समुहबाट प्रथम हुने टोलीले ५०, हजार दोस्रो हुनेले ४० हजार र तेस्रो हुने टोलीले ३० हजार रुपैयाँ प्राप्त गर्नेछ भने सान्त्वना पुरस्कार ५ हजारसहित वेस्ट च्याम्पियन स्कलर सम्पूर्ण विजेतालाई ट्रफी र मेडल प्रदान गरिनेछ ।
अध्यक्ष कोष विलास अधिकारीले आफू स्वयं अपांगता भएका व्यक्ति भएकोले अपांगता भएका व्यक्तिहरु अरु व्यक्तिहरु खेल्न सक्छन् भन्ने सन्देश दिन समेत प्रतियोगिता आयोजना गरिएको बताए ।
