उद्योग वाणिज्य महासंघ र बीभीएमडब्लु जर्मनीबीच समझदारी, नेपालमा लगानी सम्भावना खोजिने
काठमाडौ । नेपाल उद्योग वाणिज्य महासंघले जर्मन कम्पनीहरूले नेपालमा लगानी गर्ने वा नेपाली व्यवसायसँग सहकार्य गर्ने सम्भावना खोज्न बीभीएमडब्लु जर्मनीसँग एक समझदारी पत्रमा हस्ताक्षर गरेको छ ।
एमओयूमा एफएनसीसीआईका अध्यक्ष चन्द्रप्रसाद ढकाल र बीभीएमडब्लुका कार्यकारी अध्यक्ष क्रिस्टोफ अहलहसले हस्ताक्षर गरेका छन् । एमओयू हस्ताक्षर समारोह नेपालका लागि जर्मन राजदूत डा. थोमस प्रिन्जको उपस्थितिमा काठमाडौंस्थित जर्मनीको राजदूतावासमा भएको थियो ।
साे अवसरमा अध्यक्ष ढकालले नेपालले युरोपमा निर्यातमा भन्सारमुक्त पहुँच गुमाउने भएकाले नेपाल विकासोन्मुख मुलुकमा परिणत भएपछि सबैभन्दा बढी असर साना तथा मझौला उद्योगमा पर्ने बताए । उनले विशेषगरी महिलाद्वारा सञ्चालित साना तथा मझौला उद्योगहरूलाई सहयोग गर्नुपर्नेमा जोड दिए।
उनले साना तथा मझौला उद्योगको प्रवद्र्धन र विकासका लागि महासंघ र बीभीएमडब्लुले सहकार्य गर्नुपर्ने बताए ।
एमओयूको प्रमुख उद्देश्य महासंघ र बीभीएमडब्लुबीचको सहकार्य अभिवृद्धि गर्नु र लगानी प्रवर्द्धनमा सहकार्य गर्न व्यावहारिक रूप रेखा स्थापना गर्नु हो। एमओयूले आपसी सहयोगमार्फत संस्थागत सम्बन्ध सुदृढ गर्ने र क्षमता अभिवृद्धि गर्नेछ ।
एमओयू अनुसार महासंघ र बीभीएमडब्लु दुवैले लगानी नीति, नियम, विनियम, कार्यविधि, प्रोत्साहन र अवसरका बारेमा जानकारीको नियमित आदानप्रदान गर्नेछन् । नेपाल र जर्मनीसँग सम्बन्धित तथ्याङ्क र तथ्याङ्कहरू दुवै संस्थाको पहुँचमा पुग्ने गरी सामान्य अपडेटको आदानप्रदान पनि हुनेछ । साथै दुवै संस्थाले व्यापार प्रतिनिधिमण्डल वा लगानी मिशनको आदानप्रदानका लागि प्रोत्साहन र सहयोग उपलब्ध गराउन पहल गर्नेछन् । महासंघ र बीभीएमडब्लुले लगानी र उद्यमशीलता सम्बन्धी संयुक्त कार्यक्रम आयोजना गर्न एक अर्कालाई सहयोग गर्न पनि सहमति जनाएका छन् ।
