पोर्चुगलमा नेपुगल फिल्म्सको शुभारम्भ | कार्यक्रमका लागि पोर्चुगल आएका नेपाली चर्चित कलाकारहरू आज फर्किए स्वदेश
लिस्बोन, (पोर्चुगल) । यूरोपका अन्य देशहरूको तुलनामा नेपालीहरूको धेरै बसोबास रहेको पोर्चुगलमा हालै नेपुगल फिल्म्स नामक कम्पनीले आफ्ना कार्यक्रमहरू प्रस्तुत गर्न शुरू गरेको छ । गंगाबहादुर नेम्कुलले हालै सञ्चालनमा ल्याएको उक्त कम्पनीले आफ्नो शुभारम्भको अवसर पारेर यूरोपभरि नै विभिन्न कार्यक्रमहरूको आयोजना गर्न थालिसकेको छ ।
नेपुगल फिल्म्सले हालै मात्र पोर्चुगलमा आफ्नो पहिलो सांस्कृतिक कार्यक्रम भव्यताका साथ सम्पन्न गरेको छ । उक्त कार्यक्रममा चर्चित नेपाली कलाकारहरूको उपस्थिति रहेको थियो । नेपुगल फिल्मसले शुभारम्भ कार्यक्रमका लागि नेपालबाट थुप्रै चर्चित कलाकारहरू यूरोपमा आमिन्त्रत गरेको थियो । कम्पनीले चलचित्र निर्देशक ऋषि लामिछाने, गायक वीरु लामा र गायिका निर्मला घिसिङलाई पोर्चुगलमा कार्यक्रमका लागि आमन्त्रण गरेको थियो ।
निर्देशक लामिछाने र गायक लामा यूरोपका विभिन्न कार्यक्रमहरूमा सहभागी आज मंगलवार नेपाल फर्किका छन् भने गायिका निर्मला घिसिङ यूरोपका अन्य कार्यक्रमहरू र आगामी १६ फेब्रुअरीमा यूकेका हुने सांस्कृतिक कार्यक्रममा सहभागी भई नेपाल फर्किने कार्यक्रम रहेको छ ।
नेपुगल फिल्मस् यूरोपका विभिन्न देशहरूमा नेपाली म्युजिक भिडियो, नेपाली सिनेमालगायत नेपाली सांस्कृतिक कार्यक्रमहरूको आयोजना गर्दै अगाडि बढ्ने कम्पनीका प्रबन्ध निर्देशक नेम्कुलले बताए । कम्पनीले आमन्त्रित कलाकारहरूलाई नेपाल फर्किने क्रममा विशेष कार्यक्रमको आयोजना गरी बिदाइ गरेको थियो ।
