वेस्टर्न युनियन मनी ट्रान्सफरको ‘दशैंमा १० गुणा’को नतिजा सार्वजनिक

काठमाडौं । वेस्टर्न युनियन मनी ट्रान्सफरले नेपालीहरुको महान चाड दशैं, तिहार र छठ पर्वको शुभ अवसरमा जारी गरेको “दशैंमा दश गुणा”अभियानको पहिलो लक्की ड्र को नतिजा सार्वजनिक गरेको छ । योजनाको पहिलो हप्तामा वेस्टर्न युनियन मनी ट्रान्सफरबाट  रेमिटेन्स प्राप्त गरेका ग्राहकहरुको मध्ये ८ जनाले २५ हजार रूपैयाँसम्मको कारोबार रकममा दुई गुणा प्राप्त गरेका छन् । 

विजेताहरुमा निर्मला पुन मगर, अनुप खड्का, रुबी खातुन, राम प्रकाश यादव, सुसिला बस्याल न्यूपाने, देवरेन देवी, मनिका कुमारी चौधरी, सुदामा देवी मन्डल रहेका छन् । यस योजनामा सहभागी हुनका लागि, ग्राहकहरुले नेपालका सबै ७७ जिल्लाहरुमा फैलिएका वेस्टर्न युनियन मनी ट्रान्सफर सेवाका १५ हजार भन्दा बढी भुक्तानी काउन्टरहरु मध्ये कुनैबाट आफ्नो रेमिटेन्स प्राप्त गर्नुपर्नेछ । अभियान अवधिका प्रत्येक कारोबारहरु स्वतस् रुपमा साप्ताहिक र बम्पर ड्र को लागि समावेश हुनेछन् । यो योजना नेपालभर असोज ८ गते देखि सुरु भइ मंसिर १०, २०८० सम्म लागू हुनेछ।

यस योजना अन्तर्गत आठ हप्तासम्म ६४ भाग्यशाली ग्राहकहरुले २५ हजार रुपैयाँसम्मको कारोबारमा दुई गुणा र सो भन्दा बढीको कारोबारमा रु २५ हजार पुरस्कार पाउनेछन् । यसका साथै बम्परमा भाग्यशाली ग्राहकले रु एक लाख सम्मको कारोबारमा दश गुणा प्राप्त गर्नेछन् भने पचास हजार भन्दा कम कारोबारमा निश्चित पुरस्कार रु पाँच लाख प्राप्त गर्नेछन् । यदि विजेताको कारोबार रकम एक लाख रुपैयाँभन्दा बढी भएमा विजेताले निश्चित पुरस्कार रकम १० लाख प्राप्त गर्नेछन् ।