अन्तर बैंक फुटसल प्रतियोगिता सम्पन्न, पुरुषतर्फ एनआइसी एसिया र महिलातर्फ ग्लोबल आइएमई विजयी
काठमाडौं । नेपाल राष्ट्र बैंक कर्मचारी संघद्वारा आयोजित अन्तरबैंक फुटसल प्रतियोगिता २०८० को पुरुषतर्फ एनआइसी एसिया बैंक र महिलातर्फको ग्लोबल आइएमई बैंकले उपाधि जितेका छन् । संविधान दिवसको अवसरमा आयोजना गरिएको अन्तर बैंक फुटसल प्रतियोगिता २०८० मा एनआइसी एसियाले फाइनल खेलमा प्राइम कमर्सियल बैंकलाई ४–३ गोलले पराजित गरेको थियो । त्यस्तै, महिलातर्फ ग्लोबल आईएमई बैंकले स्ट्याण्डर्ड चार्टर्ड बैंकलाई टाइब्रेकरमा २–१ ले हराएको थियो ।
टुर्नामेण्टको उत्कृष्ट खेलाडी पुरुष समूहमा एनआइसी एसियाका ठाकुर श्रेष्ठ र महिलातर्फ स्ट्याण्डर्ड चार्टर्डकी अनुराधा केसी भए । सर्वाधिक गोलकर्ता पुरुषतर्फ सिद्धार्थ बैंकका शान्तिराम कार्की, महिलामा ग्लोबल आइएमईकी चन्द्रिका भट्ट भएका थिए ।
खेलमा उत्कृष्ट खेलाडी, सर्वाधिक गोलकर्ता र उत्कृष्ट गोलरक्षकलाई मेडल, ट्रफी र नगद १० हजार रुपैयाँ प्रदान गरिएको थियो । त्यस्तै, खेलका विजेता र उपविजेतालाई टिमलाई क्रमश १ लाख र ५० हजार साथै मेडल र ट्रफी प्रदान गरिएको नेपाल राष्ट्र बैंक कर्मचारी संघका अध्यक्ष प्रकाश पोखरेलले विज्ञप्तिमार्फत जानकारी दिएका छन् । विजेताहरुलाई राष्ट्र बैंकका डेपुटी गभर्नर बम बहादुर मिश्रले पुरस्कार प्रदान गरेका थिए ।
बिजेता ग्लोबल आइएमई बैंकको तर्फबाट टिम कप्तान चन्द्रिका भट्टको नेत्तृवमा लुनिभा भुजुँ, पुष्पा कोइराला, शुभेक्षा बिडारी, राम कुमारी लिम्बु, केष माया गुरुङ्ग र शोभा न्यौपाने सहभागि भएका थिए ।
टिम व्यवस्थापकको भूमिकामा गुन्जिता शर्मा र प्रशिक्षकमा सागरबहादुर सिंहको सहभागिता थियो । टिम प्रशिक्षक सिंहले उक्त प्रतियोगितामा आफ्नो टिमलाई विजेता बनाउन महत्वपूर्ण भूमिका खेलेका छन् ।
