एनएसीले भदौ २० गतेदेखि साउदी अरेबियाको दमामसम्म सिधा उडान गर्ने

काठमाडौं । नेपाल वायुसेवा निगमले भदौ २० गतेदेखि साउदी अरेबियाको दमाममा नियमित उडान गर्ने भएको छ । निगमले भदौ २० अर्थात सेप्टेम्बर ६ देखि काठमाडौंबाट साउदी अरेबियाको दमामसम्म सिधा उडानको लागि आइतबारदेखि टिकट बुकिङ खुला गरेको छ ।

उडान तालिका अनुसार काठमाडौं – दमाम – काठमाडौं सेक्टरमा निगमले हप्ताको दुई दिन बुधबार र शनिवार उडान गर्ने र बजारको माग तथा निगमको वजार व्यवस्थापन अनुसार उडानको संख्या बढाउँदै लैजाने निगमको योजना रहेको छ ।

यात्रुहरुले निगमको कार्यालय वा निगमको वेवसाइटमा लग अन गरी अनलाइनबाट वा नजिकको ट्राभल एजेन्सीबाट समेत टिकट खरिद गर्न सक्ने निगमका प्रवक्ता रमेश पौडेलले बताए ।