नास्टको उपकुलपतिमा प्रा.डा. दिलीप सुब्बा नियुक्त
काठमाडौँ । नेपाल विज्ञान तथा प्रविधि प्रज्ञा प्रतिष्ठान (नास्ट) को उपकुलपतिमा प्रा.डा. दिलीप सुब्बा नियुक्त भएका छन् । नास्टका कुलपतिसमेत रहेका प्रधानमन्त्री पुष्पकमल दाहाल प्रचण्डले सुब्बालाई उपकुलपतिमा नियुक्त गरेका हुन् ।
यसअघि प्रा.डा. सुब्बा नास्टको निमित्त उपकुलपतिको जिम्मेवारीमा रहेका थिए । निर्वतमान उपकुलपति सुनिलबाबु श्रेष्ठले आफ्नो ४ वर्षे कार्यकाल पूरा गरेर गत माघ ३ गते नास्टबाट बिदा भएदेखि नास्टमा उपकुलपति रिक्त रहेको थियो ।
त्यसपछि नास्टको उपकुलपति सिफारिसका लागि सिफारिस समितिले आवेदन माग गरेको थियो । प्राप्त आवेदन मध्येबाट सिफारिस समितिको बैठकले सुब्बासहित अन्य २ जनाको नाम सिफारिस गरेको थियो ।
सिफारिस समितिबाट सिफारिस भएका प्राडा सुब्बालाई प्रधानमन्त्री एवं नास्टका कुलपति प्रधानमन्त्री पुष्पकमल दाहालले नियुक्त गरेका हुन् । नास्टमा उपकुलपतिको कार्यकाल ४ वर्षको हुने व्यवस्था छ ।
नास्टका पूर्वसचिव भएर काम गरिसकेका सुब्बासँग नास्टका गतिविधिका जानकार छन् ।
