महिलाले ५० ग्राम र पुरुषले २५ ग्रामसम्म सुन निःशुल्क बिदेशबाट ल्याउन पाउने
काठमाडौँ । त्रिभुवन विमानस्थल भन्सार कार्यालयले विदेशबाट आउने व्यक्तिले सुन कति ल्याउन पाउने सूचना जारी गरेकाे छ । एक सूचना जारी गर्दै भन्सार कार्यालयले महिलाको हकमा ५० ग्रामसम्म सुन भित्राउन पाउने जनाएकाे हाे । यसैगरी, पुरुषको हकमा २५ ग्रामसम्म सुन निशुल्क ल्याउन पाउने भएका छन् ।
साउन २ गते, त्रिभुवन विमानस्थलकाे भन्सार कार्यालय भएर भित्रिएको १०० किलाे सुन बरामद भएपछि कार्यालयले यस्ताे सूचना जारी गरेकाे हाे ।
यस्तै, विदेशबाट फर्कनेले एक व्यक्तिले थप २०० ग्रामसम्म भन्सार महसुल तिरेर सुनका गहना ल्याउन पाउने छन् । गहनाको आकार मात्रै दिएर बनाइएका बेरुवा अौंठी, बाला, सिक्रीजस्ता रसायन प्रयोग नभएका गहनाको मान्यता भने हुनेछैन् ।
भन्सार कार्यालयले मोबाइल भने आफुले प्रयोग गरिरहेको ल्याउँदा भन्सार नलाग्ने जनाएकाे छ । श्रम स्वीकृति लिएर लगातार ६ महिनाभन्दा बढी काम गरेर फर्केका यात्रुहरूले आफ्नो साथमा थप एक थान मोवाइल भन्सार नतिरी ल्याउन पाउनेछन् ।
यसैगरी, श्रम स्वीकृति लिइ लगातार १२ महिना काम गरी फर्कने सामाजिक सुरक्षा कोषमा आवद्ध भएका नेपाली यात्रुले जुनसुकै आकार प्रकारको टेलिभिजन ल्याउँदा भन्सार तिर्नुपर्दैन । तर श्रम स्वीकृति लिइ लगातार १२ महिना काम गरेर फर्केकाे भएपनि सामाजिक सुरक्षा कोषमा आवद्ध नभएकाले भने यात्रुले ३२ इन्चसम्मको टिभी मात्र भन्सार नतिरी ल्याउन पाउनेछन् । यी दुई अवस्था बाहेक सबै टेलिभिजनहरूमा नियमानुसारकाे महसुल भन्सारमा तिर्नुपर्छ ।
