मौद्रिक नीति साउन ९ गते सार्वजनिक गर्ने राष्ट्र बैंकको तयारी

काठमाडौँ । नेपाल राष्ट्र बैंकले यही साउन ९ गते आर्थिक वर्ष २०८०/८१ को मौद्रिक नीति सार्वजनिक गर्ने तयारी गरेको छ । नयाँ आर्थिक वर्ष सुरु भएसँगै साउनको पहिलो साता नै मौद्रिक नीति ल्याउने तयारी गरिएको भएपनि गभर्नर महाप्रसाद अधिकारी देश बाहिर जानुपरेकाले समय सरेको हो । 

अर्थमन्त्री डा.प्रकाशशरण महतसँगै गभर्नर अधिकारी भारतमा आयोजित जी–२० सम्मेलनमा भाग लिएर बुधबार मात्र स्वदेश फर्किएका छन् । यसलगत्तै मौद्रिक नीति सार्वजनिकको तयारी गरिएको राष्ट्र बैंकका सूचना अधिकारी नारायणप्रसाद पोखरेलले जानकारी दिए । 

पोखरेलका अनुसार मौद्रिक नीति साउनको दोस्रो हप्ता ७  देखि ९ गतेभित्र सार्वजनिक गर्ने तयारी राष्ट्र बैंकको रहेको छ । 

बिहीबार बसेको अर्थ समितिको बैठकमा गभर्नर अधिकारीले बजेटले लिएको आर्थिक वृद्धिदर हासिल गर्ने, मूल्यवृद्धि नियन्त्रण गर्ने र बाह्य क्षेत्र व्यवस्थापन हुने गरी चालु आवको मौद्रिक नीति जारी गरिने वचन दोहोर्‍याएका छन् । सरकारले गत जेठ १५ गते ६ प्रतिशत माथिको आर्थिक वृद्धिदर हासिल गर्ने लक्ष्यसहित १७ खर्ब ५१ अर्ब ३१ करोड रुपैयाँ बराबरको अनुमानित बजेट ल्याएको छ । सोही बजेटले लिएको आर्थिक वृद्धिदरको लक्ष्य, रोजगारी सिर्जना गर्नेदेखि मुलुकको वित्तीय तथा मौद्रिक नीतिको सुधार गर्नेगरी मौद्रिक नीति ल्याउने उनले बताए ।