काम गरेर फर्किएकालाई इपिएस कोरिया शाखाले भाषा परीक्षाको लागि खुलायो आवेदन
काठमाडौं । इपिएस कोरिया शाखाले कोरियामा काम गरेर फर्किएकालाई भाषा परीक्षाको आवेदन खुलाएको छ ।
एक सूचना जारी गदै शाखाले पाँच वर्ष कोरियामा रोजगार गरेर फर्किएकाले साउन १३ देखि १५ गतेसम्म आवेदन दिन सक्ने जनाएको छ । आगामी भदौ १८ देखि २९ गतेसम्म हुने परीक्षाको नतिजा प्रकाशन असोज ३ गते हुने बताइएको छ ।
शाखाले सूचना प्रकाशित गरेर भनेको छ ‘नेपाल सरकार र गणतन्त्र कोरिया सरकार बीच सम्पन्न समझदारीअन्तर्गत दक्षिण कोरियाबाट काम गरी वैधानिक तवरले फर्केका कामदारहरुलाई पुनः कामदारको रूपमा पठाउने प्रक्रिया अनुरूप आवेदन खुला गरिएको हो’ ।
जसमा सन् २०१० जनवरी १ पश्चात् भिसा अवधिभित्रै स्वैच्छिक रूपले नेपाल फर्केका कामदारहरूले आवेदन दिन सक्नेछन्। आवेदकको उमेर १८ वर्ष पूरा भई ३९ वर्ष ननाघेको हुनुपर्ने शाखाले बताएको छ।
