सिबिफिन र पूर्वाञ्चल विश्वविद्यालयबिच सम्झौता

काठमाडौं । नेपालको बैंकिङ क्षेत्रमा देखिएको वर्तमान आवश्यकता, बजारमा उपलब्ध मानवीय पुँजीको समग्र अवस्था, आम विद्यार्थीहरूको बैंकिङ क्षेत्रप्रतिको आकर्षण एवं आकाङ्क्षालाई मध्यनजर गर्दै आवश्यक दक्ष एवं प्रतिस्पर्धी मानवीय पुँजीको उत्पादन एवं उपयोगका लागि उत्कृष्ट पाठ्यक्रम निर्माण तथा कार्यान्वयनका लागि बैंक तथा वित्तीय संस्था परिसंघ नेपाल (सिबिफिन) र पूर्वाञ्चल विश्वविद्यालयवीच सम्झौता सम्पन्न भएको छ ।

उक्त सम्झौतामा सिबिफिनकोतर्फबाट अध्यक्ष पवनकुमार गोल्यान र पूर्वाञ्चल विश्वविद्यालय कोतर्फबाट उपकुलपति प्रा.डा. यादवराज कोइरालाले हस्ताक्षर गरी सम्पन्न गरिएको छ ।

शिक्षालाई सिपसँग, सिपलाई श्रमसँग र श्रमलाई व्यवहारिकता-उत्पादनसँग जोड्दै राष्ट्रिय एवं अन्तर्राष्ट्रिय बैंकिङ क्षेत्रमा प्रतिस्पर्धा गर्न सक्ने दक्ष एवं क्षमतावान् मानवीय पुँजीको उत्पादन तथा विकासका लागि अन्तर्राष्ट्रियकरण पाठ्यक्रम निर्माण गरी देश भित्र नै अध्ययन-अध्यापनको उपयुक्त अवसर सृजना गर्नु, देशैभित्र मानवीय पुँजीको उपयुक्त परिचालन तथा उपयोग गर्नु र नेपालको बैंकिङ क्षेत्रले प्राप्त गरेको विश्वास र प्रतिष्ठालाई अन्तर्राष्ट्रियकरण गर्नु उक्त सम्झौता पत्रको मुख्य उद्देश्य रहेको छ ।

कर्जा जोखिम, सम्पत्ति व्यवस्थापन, तरलता र जोखिम मूल्याङ्कन, तरलता र जोखिम व्यवस्थापन, वित्तीय उपकरण विकास, वित्तीय इन्जिनियरिङ, डिजीटल-क्रिप्टो करेन्सी, वित्तीय मोडेलिङ, वित्तीय स्थायित्व, वित्तीय समावेशीकरण, डिजिटल फाइनान्स, छायाँ बैंकिङ, स्टार्ट अप बिजनेस, स्वउद्यमशीलता जस्ता नविन विषयहरू र बैंकिङ क्षेत्रमा प्रवेश गरिसकेपछि व्यवहारिकरुपमा सम्पादन गर्नुपर्ने कार्यहरूका विषयमा पाठ्यक्रम निर्माण हुनेछ । त्यसै गरी विदेशी मुद्रा नीति, विदेशी विनिमय

व्यवस्थापन-विदेशी विनिमय दर र विदेशी मुद्रा नीतिमा यसको प्रभाव, भुक्तानी प्रणाली विकास, भुक्तानी उपकरण, भुक्तानी प्रणाली पूर्वाधार, इलेकट्रोनिक भुक्तानी प्रणाली, ई–बैङ्किङ-डिजिटल बैंकिङ, ब्याजदर, निक्षेप, कर्जा, पुँजी बजारको विकास, पुँजी बजारका साधन र पूर्वाधार जस्ता विषयहरूमा प्राप्त हुने व्यवहारिक ज्ञानले कार्यसम्पादनमा चुस्तता एवं नवपूर्णताको विकास गर्ने र वर्तमान तथा भविष्यमा बैंकिङ क्षेत्रमा देखिने जोखिम व्यवस्थापनसहित बैंकिङ क्षेत्रको दिगो विकासमा महत्त्वपूर्ण सहयोग पुग्ने अपेक्षा राखिएको छ ।

प्रारम्भिक चरणमा स्नातकोत्तर तहमा लागू हुने यस पाठ्यक्रमलाई बिस्तारै तल्लो तहबाट नै लागू हुने गरी थप पाठ्यक्रम निर्माण गर्ने लक्ष्य राखिएको छ । पाठ्यक्रम निर्माणका लागि ख्यातिप्राप्त विषयविज्ञहरु रहेको एक कार्यदल गठन गरी सरोकारवाला पक्षहरूसँग व्यापक छलफल तथा परामर्श गर्ने कार्य तत्काल आरम्भ गरिनेछ ।

हस्ताक्षर कार्यक्रममा बोल्दै सिबिफिनका अध्यक्ष पवनकुमार गोल्यानले यस सम्झौताको प्रभावकारी कार्यान्वयनमा जोड दिँदै बैकिङ बजारको आवश्यकताको परिपूर्ति मात्र नभई स्तरीय शिक्षाका लागि ठुलो सङ्ख्यामा बिदेसिने युवा जनशक्ति र धनराशिलाई रोक्दै शिक्षाका लागि विदेशी विद्यार्थीहरूलाई आकर्षित गर्न र नेपाललाई शैक्षिक पर्यटनकोरुपमा विकास गर्न पनि यस सम्झौताको कार्यान्वयनले महत्त्वपूर्ण टेवा पुग्ने धारणा व्यक्त गरे ।

त्यसै गरी पूर्वाञ्चल विश्वविद्यालयका उपकुलपति प्रा.डा. यादवराज कोइरालाले निर्माण हुने पाठ्यक्रम पूर्वाञ्चल विश्वविद्यालयमा लागू गर्ने बताउँदै, उक्त पाठ्यक्रमले बैकिङ क्षेत्रका व्यवहारिक विषयहरूमा ज्ञान दिनुका साथै विश्वस्तरमै प्रतिस्पर्धा गर्न सक्ने सक्षम जनशक्तिको उत्पादनमा ठोस योगदान पुग्ने विश्वास व्यक्त गरे । साथै उनले विद्यमान पाठ्यक्रमलाई समेत समयानुकूल परिमार्जन गरिने समेत बताए ।

सिबिफिनको कार्यालय, सुन्धारामा सम्पन्न भएको उक्त सम्झौता हस्ताक्षर कार्यक्रममा सिबिफिनका सचिव कुश प्रसाद मल्ली, कार्यकारी सदस्य द्वय उपेन्द्र प्रसाद पौडेल, महेन्द्रकुमार गोयल, महानिर्देशक डा. गोपाल प्रसाद तिवारी र पूर्वाञ्चल विश्वविद्यालयका रजिस्ट्रार नीलमणि पोखरेल, डीन प्रा.डा. बिजु कुमार थपलिया, निर्देशक (एमफिल-पिएचडी कार्यक्रम) डा. उत्तम कुमार रेग्मी, विषय समितिका अध्यक्ष प्रा.डा. सदय हमाल र वरिष्ठ अधिकृत विनय भट्टराईको उपस्थिति रहेको थियो ।