राष्ट्र बैंकले गर्यो ९ बैंक र एक सिईओ लाई कारबाही, तिरायो १५ करोड जरिवाना
काठमाडौं । नेपाल राष्ट्र बैंकले विभिन्न वाणिज्य बैंक र त्यसका अध्यक्ष, सञ्चालकदेखि प्रमुख कार्यकारी अधिकृत (सिईओ)सम्मलाई कारबाही गरेको छ । शुक्रबार राष्ट्र बैंकले विभिन्न कसुरहरूमा ९ वटा बैंक र सिईओलाई १५ करोड ३७ लाख रुपैयाँ जरिवानासहित कारबाही गरेको हो ।
राष्ट्र बैंकका अनुसार तत्कालीन क्रेडिट एण्ड कमर्स बैंक (हाल कुमारी बैंक)लाई सहुलियतपूर्ण कर्जा कार्यविधि विपरीत एउटै समूहलाई बढी प्रवाह गरेको लगायतका कसुरमा सचेत गराइएको छ । सो बैंकले कतिपय कर्जाहरूको प्रिमियम दर परिवर्तन गर्ने र पर्याप्त कर्जा नोक्सानी व्यवस्थापन समेत नगर्दा यस बैंकका सिईओ कारबाहीमा परेका हुन् ।
सो बैंकका प्रमुख कार्यकारी अधिकृतले आफ्नो अख्तियारी भन्दा बाहिर गई कर्जा स्वीकृत गरेको भन्दै तत्कालीन प्रमुख कार्यकारी अधिकृत अमृत चरण श्रेष्ठलाई पाँच लाख रुपैयाँ राष्ट्र बैंकले तिराएको छ ।
त्यस्तै, कुमारी बैंक लिमिटेडले पनि सहुलियतपूर्ण कर्जाको औचित्य पुष्टि नगर्दा निक्षेपमा प्रकाशित ब्याजदर भन्दा बढी ब्याज दिँदा र पर्याप्त कर्जा नोक्सानी व्यवस्था नगर्दा यस बैंकका सिईओलाई समेत सचेत गराइएको छ ।
राष्ट्रिय वाणिज्य बैंकलाई सम्पत्ति शुद्धीकरण सम्बन्धी ऐन र निर्देशन उल्लङ्घन गरेको भन्दै १० लाख रुपैयाँ जरिवाना तिराइएको छ । यसका साथै तत्कालीन सेन्चुरी कमर्सियल बैंक (हाल प्रभु बैंक)लाई गत साउन र भदौ महिनामा कर्जा/निक्षेप अनुपात कायम नगरेको भन्दै राष्ट्र बैंकले २ करोड ८४ लाख रुपैयाँ जरिवाना तिराएको छ ।
सोही कसुरमा नेपाल बैंक लिमिटेडलाई पनि १८ लाख ५९ हजार ७५२ रुपैयाँ, नबिल बैंकलाई ६ करोड ४६ लाख ४५ हजार रुपैयाँ र ग्लोबल आईएमई बैंकलाई चार करोड ४२ लाख ४६ हजार रुपैयाँ जरिवाना तिराइएको छ ।
यस्तै कसुरमा अन्य दुई वाणिज्य बैंकलाई पनि जरिवाना तिराइएको छ । कृषि विकास बैंक लिमिटेडलाई ६९ लाख ५८ हजार ८३१ रुपैयाँ र हिमालयन बैंक लिमिटेडलाई ७१ लाख ७२ हजार ९५९ रुपैयाँ जरिवाना तिराएको राष्ट्र बैंकले जनाएको छ ।
