डिल्ली बजार र दमक मालपोतका ९ जना कर्मचारीविरुद्ध मुद्दा दायर | नक्कली जग्गाधनी खडा गरी लिखत पास गरेको अभियोग
काठमाडौँ । अख्तियार दुरुपयोग अनुसन्धान आयोगले मालपोत कार्यालय डिल्लीबजार र दमकका कर्मचारीसहित ९ जनाविरुद्ध विशेष अदालतमा मुद्दा दायर गरेको छ । आयोगले मालपोत कार्यालय, डिल्लीबजार र दमकका कर्मचारीले मिलेमतो गरी टेकमाया आङहाङको नाममा रहेको जग्गाको नक्कली जग्गाधनी खडा गरी विक्री गरेको आरोप लगाउँदै हिजो बुधवार विशेष अदालतमा मुद्दा दायर गरेको बताएको हो ।
आयोगले मालपोत कार्यालय डिल्लीजारका मालपोत अधिकृत केशवप्रसाद नेउपाने, राजेन्द्र फुयाँल, नायब सुब्बा लक्ष्मणप्रसाद भट्टराई, खरिदार विजयभक्त श्रेष्ठ, मालपोत कार्यालय दमकका मालपोत अधिकृत अग्नि घिमिरे, नायब सुब्बाद्वय डिल्लीराम कोइराला र जयन्द्रराज खड्काविरुद्ध मुद्दा दायर गरेको छ ।
त्यस्तै, वयरवन–९ मोरङका फौदराज लिम्बू र अभिवक्ता चन्द्रप्रसाद खनालविरुद्ध रू. १ करोड २० लाखबराबरको बिगोसमेत असुलउपर गर्न माग गर्दै आयोगले हिजो बुधवार मुद्दा दायर गरेको छ ।
झापाको दमक नगरपालिका–४ मा रहेको कित्ता नम्बर ४८७३ र ४८७५ को जग्गाको कीर्ते जग्गाधनी दर्ता प्रमाणपुर्जा बनाई नक्कली जग्गाधनी खडा गरी मालपोत कार्यालय, डिल्लीबजारबाट २०६९ साल फागुन ३१ मा जिल्ला बाहिरको (बेजिल्ले) रजिस्ट्रेशनको लिखत पारित गराएको आयोगको दाबी छ ।