प्रथम प्रणामी सिङ्गिङ आइकन रियालिटी शो दिव्यदर्शन टीभीबाट प्रसारण हुने |
काठमाडौं । प्रथम प्रणामी सिङ्गिङ आइकन रियालिटी शो दिव्यदर्शन टीभी र प्रणामी सिङ्गिङ आइकनको अफिसियल युट्युब र फेसबुकमार्फत प्रसारण हुने भएको छ ।
आयोजकले धार्मिक क्षेत्रकै पहिलो भजन प्रतियोगिता दाबी गरेको उक्त रियालिटी शो १३ असोजदेखि प्रत्येक बिहीबार बेलुका साँढे ८ बजे दिव्यदर्शन टीभीबाट प्रसारण हुनेछ ।
आयोजकका अनुसार डिजिटल अडिसनमा नेपाल र भारतका प्रतियोगीहरूले भाग लिएका थिए । त्यसबाट छानिएका १२ जनाबीच प्रतिस्पर्धा हुनेछ । प्रतिस्पर्धाको निर्णायकमा गायिकाद्वय शारदा अधिकारी मैनाली र सविता प्रसाईं सापकोटा छन् । उक्त रियालिटी शोमा भजन तथा वाणी प्रस्तुत गरिनेछ ।
श्रीकृष्ण प्रणामी सेवा समिति नेपाल, श्रीकृष्ण प्रणामी युवा परिषद् नेपाल र श्रीकृष्ण प्रणामी बाइजुराज महिला समिति नेपालको संयुक्त आयोजना र श्रीकृष्ण प्रणामी निजानन्द धाम नजरपुर र श्रीकृष्ण प्रणामी नवतनधामको सहयोगमा उक्त रियालिटी शो हुन लागेको हो ।
ग्लोबल अनलाइन पेका माध्यमबाट भोटिङका आधारमा छनोट हुँदै चार जना प्रतियोगीहरूबीच फाइनल हुने आयोजकले जनाएको छ ।
