३ नं प्रदेशका मुख्यमन्त्री लाई विद्युतीय कार |

हेटौँडा । ३ नं प्रदेशका मुख्यमन्त्री डोरमणि पौडेलका लागि विद्युतीय कार खरीद गरिएको छ । सूर्या गुड्स सप्लाइ प्रालि मार्फत खरीद गरिएको चीनमा निर्मित बि वाइ डी कम्पनीको कार दुई घण्टा चार्ज गरेपछि ४०० किमीसम्म चल्छ । यसको क्षमता ३१७ भोल्ट रहेको छ ।
विद्युतीय कार १० वर्षसम्म सामान्य ब्याट्री मर्मत मात्र गरे पुग्ने बताइएको छ । पेट्रोल र डिजेलको कार–जीपभन्दा सञ्चालन खर्च निकै कम हुने विशेषता भएको सो कारको मूल्य ५५ लाख रुपैयाँ रहेको मुख्यमन्त्रीको सचिवालयले जानकारी दिएको छ ।
प्रदेश सरकारले प्रदेशसभामा नीति तथा कार्यक्रम र बजेटमा ३ नं प्रदेशमा आगामी १० वर्षभित्र पेट्रोल, डिजेलबाट चल्ने सवारी विस्थापन गरी विद्युतीय सवारी साधन चलाउन प्राथमिकता दिने योजना प्रस्तुत गरिएको थियो । मुख्यमन्त्री डोरमणि पौडेलले प्रदेश सरकारले छिट्टै चीनबाट २५ वटा सार्वजनिक यातायातका विद्युतीय बस पनि खरीद गर्ने प्रक्रिया चलाएको बताएका छन् ।