सानिमा बैंकको नाफा १ अर्बभन्दा बढी |
काठमाडौं । सानिमा बैंक लिमिटेडले चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार सो अवधिसम्ममा बैंकको खुद नाफा सामान्य बढेको छ।
चालु आर्थिक वर्षको पुस मसान्तसम्ममा बैंकले १ अर्ब ७ करोड ७० लाख रुपैयाँ खुद नाफा कमाएको छ। यो गत आर्थिक वर्षको सोही अवधिको तुलनामा १.३४ प्रतिशत बढी हो। खुद ब्याज आम्दानी सामान्य बढेपनि सञ्चालन मुनाफा घटेका कारण बैंकको नाफामा दबाब पुगेको हो।
समीक्षा अवधिमा बैंकको खुद ब्याज आम्दानी ९.३४ प्रतिशत बढेको छ भने खुद फि तथा कमिशन आम्दानी ३.६९ प्रतिशत बढेको छ। समीक्षा अवधिमा बैंकको सञ्चालन मुनाफा भने ०.३४ प्रतिशत घटेको छ। गत आर्थिक वर्षको पुस मसान्तसम्ममा ११ करोड ७६ लाख रुपैयाँ रहेको बैंकको इम्पेरमेन्ट चार्ज चालु आर्थिक वर्षको सोही अवधिसम्ममा २२ करोड ३ लाख रुपैयाँ पुगेको छ। जसले गर्दा सञ्चालन मुनाफा घट्न पुगेको हो। सो अवधिसम्ममा बैंकको वितरण योग्य मुनाफा ५७ करोड ८२ लाख रुपैयाँ रहेको छ।
नाफा बढेपनि बैंकको प्रतिशेयर आम्दानी अर्थात ईपीएस भने घटेको छ। समीक्षा अवधिमा बैंकको यस्तो आम्दानी २२ रुपैयाँ २ पैसाबाट घटेर १९ रुपैयाँ २ पैसामा झरेको छ। सो अवधिसम्ममा बैंकको मूल्य आम्दानी अनुपात २०.१९ गुणा रहेको छ भने प्रतिशेयर नेटवर्थ १४० रुपैयाँ २ पैसा रहेको छ।
चालु आर्थिक वर्षको पहिलो ६ महिनामा बैंकको चुक्ता पूँजी १७ प्रतिशत बढेको छ भने जगेडा कोष १३.५१ प्रतिशत घटेको छ। सो अवधिमा बैंकको निक्षेप १२.५४ प्रतिशत घटेको छ भने कर्जा १४.१३ प्रतिशत बढेको छ।
