१६ बर्षपछि फिल्ममा एकसाथ देखिदैं भूवन र शिव |
काठमाडौं । निर्देशक शोभित बस्नेतले निर्देशन गरेको ‘राजु राजा राम’ नामक चलचित्रमा एकसाथ काम गरेपछि नायक भूवन केसी र शिव श्रेष्ठ एकसाथ पर्दामा देखिएका थिएनन् । नेपाली चलचित्र क्षेत्रमा कुनै समय बक्स अफिसमा धमाका मच्चाएका यी दुई नायक अब भने एकसाथ देखिने भएका छन् ।
१६ बर्षपछि शोभितकै निर्देशनमा बनिरहेको चलचित्र ‘डाँडाको बर पीपल’मा उनीहरुलाई एकसाथ देख्न पाइनेछ । यो चलचित्रको छायांकन कोरोना महामारीको दोश्रो लहर अगाडि नै सुरु भएको थियो । तर, दोश्रो लहर आएसँगै रोकिएको यो चलचित्रको छायांकन भदौ ५ गतेबाट सुरु हुनेछ ।
निर्देशक बस्नेतले २ कलाकारलाई एकसाथ प्रस्तुत गर्न पाउँदा आफू उत्साहित रहेको बताए । ६० दिन भित्र यो चलचित्रको छायांकन पुरा गर्ने लक्ष्य निर्माणपक्षको छ । नायक भूवन केसीले आफूले शोभितकै आग्रहमा काम गर्न लागेको बताए । उनले भने–‘मैले चलचित्रको अफर आयो गरिहालौं भनेर काम गर्न लागेको होइनँ, शोभित नजिकको मान्छे भएकाले पनि काम गर्न लागेको हुँ ।’ भुवनका अनुसार, चलचित्रमा उनी अतिथी भूमिकामा देखिनेछन् ।
यो चलचित्रका लागि नायक शिव श्रेष्ठ केही महिना अगाडि नै अनुवन्धित भएका थिए । चलचित्रमा गौरी मल्ल, सलोन बस्नेत, रुविना थापा, राजिवजंग बस्नेतको पनि मुख्य भूमिका छ ।
सुशान्त प्रजापतिको छायांकन, रामजी लामिछाने र गोविन्द राईको कोरियोग्राफी, रामकाजी घिमिरेको लेखन, शिव मुखिया र एलिस कार्कीको संगीत, रोशन श्रेष्ठको एक्सन रहनेछ । चलचित्रलाई नवराज गिरीले निर्माण गरिरहेका छन् ।
