बिटक्वाइनको मूल्य ३० हजारभन्दा तल, क्रिप्टोकरेन्सीको कारोबार रोक्न चीनले दियोे कडा निर्देशन |
चीनले डिजिटल मुद्रा क्रिप्टोकरेन्सीहरुमाथिको हस्तक्षेपमा विस्तार गर्दै देशभित्रका बैंक तथा भुक्तानी प्लाटर्फमहरुलाई डिजिटल क्रिप्टोकरेन्सी मुद्रामा हुने भुत्तानीलाई रोक्न निर्देशन दिएको छ ।
गत शुक्रबार सिचुआन प्रान्तमा हुने बिटक्वाइनको माइनिङ रोक्ने आदेश दिएको चीनको भोलिपल्टै बैंक तथा भुक्तानी कम्पनीहरुलाई यस्तो निर्देशन दिएको हो । स्मरण रहोस् गत वर्ष विश्वमा भएको बिटक्वाइनको कूल उत्पादन मध्ये ६५ प्रतिशत चीनमै भएको थियो । क्याम्ब्रिज विश्वविद्यालयको एक रिपोर्ट अनुसार चीनको सिचुआन प्रान्त बिटक्वाइनको दोश्रो ठूलो उत्पादकको रुपमा रहेको छ ।
तर पछिल्लो चिनिया कदमसँगै बिटक्वाइनको मूल्यमा झनै गिरावट देखिएको छ । सोमबार १० प्रतिशतले घटेको बिटक्वाइनको शेयर मूल्य मंगलबार झनै खस्किएर ३० हजार भन्दा तल झरेको छ।
गत अप्रिल महिनामा सबैभन्दा धेरै ६३ हजार डलर पुगेको बिटक्वाइनको मूल्य त्यसयता आधाभन्दा धेरैले घटिसकेको छ ।
चीनको केन्द्रीय बैंक पिपुल्स बैंक अफ चाइनाले देशका मुख्य बैंक तथा भुक्तानी कम्पनीहरुलाई बोलाएर क्रिप्टोकरेन्सीको व्यापार रोक्नका लागि कडा कदम चाल्नका लागि निर्देशन दिएको थियो ।
सबै बैंकहरुलाई क्रिप्टोकरेन्सीको कारोबारहरुमा ट्रेडिङ, क्लियरिङ तथा सेटलमेन्ट जस्ता वस्तु तथा सेवा उपलब्ध नगराउन निर्देशन दिइएको पिपुल्स बैंक अफ चाइनाले आफ्नो विज्ञप्तिमा जनाएको छ ।
चीनको तेश्रो ठूलो कर्जा प्रदायक बैंकको रुपमा रहेको कृषि बैंकले केन्द्रीय बैंकको निर्दैशिका कार्यान्वयन गरिसकेको र आफ्ना ग्राहकहरुबाट हुने क्रिप्टोकरेन्सी माइनिङ तथा कारोबार रोक्नका लागि सचेत रहेको जनाएको छ ।
चीनको हुलाक बचत बैंकले पनि क्रिप्टोकरेन्सीको कारोबारलाई प्रवर्द्धन नगर्ने जनाएको छ ।
त्यस्तै चीनको मोबाइल तथा अनलाइन भुक्तानी प्लाटर्फम अलिपेले अवैध क्रिप्टोकरेन्सी कारोबार पत्ता लगाउनका लागि अनुगमन प्रणाली स्थापना गरेको जनाएको छ ।
गत महिना चीनको मन्त्रीपरिषदले वित्तीय जोखिम नियन्त्रण गर्ने अभियानकै हिस्साका रुपमा क्रिप्टोकरेन्सीको माइनिङ र कारोबार नियन्त्रण गर्ने निर्णय गरेको थियो ।
पछिल्लो समय घटिरहेको बिटक्वाइनको मूल्यमा अझै गिरावट आउनसक्ने विश्लेषकहरुले बताएका छन् । बिटक्वाइनको गिरावट सँगै अन्य क्रिप्टोकरेन्सीहरुको मूल्य पनि घटिरहेको छ । विश्वव्यापी रुपमा क्रिप्टोकरेन्सीमाथि कडा नियमन हुने चिन्ता लगानीकर्ताहरुमा बढिरहेका कारण क्रिप्टोकरेन्सीहरुको मूल्यमा गिरावट आइरहेको हो ।
उता चर्चित लिलाम घर सोथबाइजले भने आगामी महिना हुने दुर्लभ नास्पाती आकारको हिराको लिलामी गर्ने र १ करोड ५० लाख डलरसम्ममा बिक्री गरिने उक्त हिरा क्रिप्टोकरेन्सीबाट पनि खरीद गर्न सकिने जनाएको छ ।
यति महँगो वस्तु क्रिप्टोकरेन्सीबाट किन्न सकिने गरिने लिलामीमा राखिएको यो पहिलो घटना हुनेछ ।
बीबीसी
