मंगलबारदेखि शेयर बजार खुल्ने |
काठमाडौं । शेयर बजार मंगलबारदेखि खुल्ने भएको छ । नेपाल धितोपत्र बोर्डले मंगलबारदेखि नियमित रुपमा बजारको कारोबार सुरु गर्न निर्देशन दिने तयारी गरेको हो ।
शुक्रबार लगानीकर्ताहरुसँगको छलफलपछि नेपाल धितोपत्र बोर्ड बजारको कारोबारलाई खुला गर्ने निष्कर्षमा पुगेको थियो । तर त्यसलाई औपचारिकता दिन बोर्डको सञ्चालक समितिको बैठक आइतबार बस्दैछ । आइतबारको बैठकले शेयर बजार खुला गर्ने सम्बन्धमा निर्णय गर्ने अध्यक्ष भीष्मराज ढुंगानाले जानकारी दिए ।
‘भोलि हाम्रो सञ्चालक समितिको बैठक बस्दैछ । बैठकपछि मुन मोडालिटीबाट बजार खोल्ने भन्ने छलफल हुन्छ, छिटै नै बजार खोल्न हामी निर्देशन दिन्छौं’ अध्यक्ष ढुंगानाले भने, ‘बजारलाई कुन मोडालिटीबाट खुला गर्ने भन्नेमा हामी छलफल गर्छौं, त्यही अनुसार कहिलेदेखि खुला गर्ने भन्ने निश्चित हुन्छ, तर हामी बजार खोल्न विलम्ब नगर्ने पक्षमा छौं ।’
अब बजार खोल्दा सामान्य अवस्थाझैं बजार खुल्ने कि लकडाउनको बीचमा खुलेको बजारजस्तै व्यवस्था गर्ने भन्नेमा अहिलेमा आइतबारको बैठकमा छलफल हुनेछ । सामान्य अवस्थाअनुसार बजार सञ्चालन भयो भने बजार ५ घण्टा खुल्नेछ । स्क्रिपको मूल्य १० प्रतिशतसम्म र इन्डेक्स ६ प्रतिशतसम्म घटबढ हुन सक्नेछ ।
तर विशेष परिस्थिति अन्तर्गत बजार खुला गर्ने हो भने दिनको २ घण्टामात्रै कारोबार हुनेछ । त्यस्तै, यसअघिजस्तै दिनको २ प्रतिशत भन्दा बजार घटबढ हुन सक्ने छैन । तर बोर्ड अब सामान्य अवस्था अनुसार दैनिक ५ घण्टाको दरले कारोबार गर्ने पक्षमा रहेको अध्यक्ष ढुंगानाले बताए ।
‘सामान्य अवस्थाअनुसार बजार खुला हुने भयो भने मंगलबारदेखि कारोबार सुरु हुन्छ, विशेष अवस्थाअनुसार खुला गर्ने हो भने १÷२ दिन ढिला हुन सक्छ, तर अब हामी सामान्य ढंगबाटै कारोबार सुचारु गर्ने पक्षमा छौं ।’
